МЫЙЛА?..

Барбос — ыджыд сьӧд пон. Век эргӧ, скӧрысь увтчӧ ветлысь-мунысьяс вылӧ, усьласьӧ. Ӧтчыд сійӧ ас дорас корис Шарикӧс:

— Эй, пацан, волы татчӧ!

Шарик шензьӧмӧн видзӧдліс сы вылӧ:

— А он пур-р?

— Ыр-р-р... Эн пов, ог вӧр-рзьӧд...

Шарик матыстчис сы дорӧ, чолӧмасис. Мӧдыс весиг синсӧ эз лапнит, бугжыльӧн видзӧдліс сы вылӧ да юаліс:

— Тэ ӧд ичӧтик, слабиник понпи на, а мыйла тэнӧ радейтӧны? Мыйла тэкӧд ставӧн ворсӧны да дружитӧны?

— Мыйла? — думыштчис Шарик, сэсся шуис: — Да, кӧнкӧ, сы вӧсна, мый ме некодкӧд ог косясь, ог пур-рсьы...

— Аддзан, ме вот ыджыд, ён, смел, весиг кӧинысь ни ошкысь ог пов, а менӧ мыйлакӧ оз радейтны, ӧтдортчӧны меысь? Мыйла?

— Чудак тэ! Ой, извинитӧй, ме эг кӧсйы тадз шуны... Мыйла, шуан, оз радейтны? Да тэ жӧ быдӧн вылӧ эрган, скӧрысь увтчан, усьласян... Код нӧ кутас радейтны таысь? Тэысь быдӧн полӧны, со и пышъялӧны... Тэ кӧ вӧлін рам, мелі, эн усьлась быдӧн вылӧ — сэки мӧд делӧ...