ОК, ЭСЬКӦ МЕНАМ КӦ ВӦЛІ

Польӧпи Рук-Рук норасьӧ Шариклы:

— Ме свет вылас медся коньӧрыс...

— Гав-гав! Мый лоис?

— Ставӧн ылысь и вылысь аддзӧны, вермӧны видзӧдлыны водзӧ и бӧрӧ... — ышловзис Рук-Рук. — А ме... ме сӧмын ныр улысь аддза... Ок, эськӧ менам кӧ вӧлі ку-узь сьылі, жирафлӧн кодь... Ме эськӧ пыр жӧ вежси сыкӧд...

— А мый вылӧ тэнад кузь сьыліыс?

— Ковмывлӧ тай! — шога вочавидзис Рук-Рук.

— Но век жӧ мый вылӧ тэныд сійӧ ковмылӧ? — эз лэдзчысь Шарик.

— Мыйла? Мыйла? Быттьӧ ачыд он тӧд... Ӧти-кӧ, быдтор кута аддзыны ылысь...

— А ещӧ мыйла?

— Ещӧ? Шуам, лоӧ кӧ кино либӧ концерт, позьӧ пуксьыны любӧй местаӧ, весиг медбӧръя скамья вылас.

— Но а ещӧ?

— А ещӧ град йӧрысь потшӧс вомӧн позьӧ свежӧй картупель кодйыштны, морковӧн да сёркниӧн чӧсмасьны...

— Вежсьы но, ёна кӧ колӧ... А кӧні нӧ Жирафыс? — юаліс Шарик.

— Ог тӧд... Ме сійӧс картинка вылысь аддзылі...

— Гав-гав! — серӧктіс Шарик да котӧртіс аслас чом дорӧ.