ГӦГӦРВОИС...

Туй кузя мунӧ Меж — Чукля Сюр — да ыджыд гӧлӧсӧн бӧрдӧ. Сылы воча пошкигтыр локтӧ-кыссьӧ кузь дзор тошка кӧза, кыскӧ сійӧ кык сумка тыр капуста. Сувтіс да юалӧ:

— Мый нӧ, Чукля Сюр, тэкӧд лои? Мыйла бӧрдан?

— Кыдз нӧ он бӧрд... Менӧ батьӧй вӧтліс гортысь...

— Батьыд вӧтліс? — чуймис Кӧза. — Но и но! А мыйысь нӧ вӧтліс?

— Да шуӧ тай, мый ме-е-е пӧ гырысьджыкъясӧс ог пыдди пукты, бабӧс пӧ ӧбижайта... Мун пӧ менам син водзысь кытчӧ окота да велӧдчы, кыдзи колӧ пӧчитайтны гырысьджыкъясӧс... Кор пӧ велалан, верман бӧр локны гортӧ... — синвасӧ ньылалігтыр норасис Чукля Сюр.

— Дугды, эн бӧрд. Велалан!..

— Кыдз нӧ велалан, кор сэтшӧм школаыс некӧн абу...

— Ладнӧ, ладнӧ... Мыйкӧ думыштлам. Ме ичӧт дырйи тэ кодь жӧ лукав да асныра вӧлі... Ме отсала тэныд!..

— Збыльысь? — Нимкодь лоис мегаринлы.

— Тэнад паметьыд бур?

— Ог норась... Кор ог люкась, ставсӧ помнита...

— Сідзкӧ, вот кывзы. Некор эн вунӧд, мый гырысьджыкъяскӧд колӧ сёрнитны вежливӧя, некор эн горзы, видчы... Накӧд эн люкась, эн лапӧд налы пельпомъясас. Век колӧ кывзысьны налысь... Автобусын кӧ тэ пукалан, чеччы да места сет сылы... Гӧгӧрвоин? А ещӧ: кор пӧрысь пӧчьяс да дедъяс нуӧны сьӧкыд сумкаяс, босьт да отсав нуны гортӧдзыс...

— Аттьӧ... Час, котӧрта гортӧ да висьтала батьлы, мый ме велалі нин пыдди пуктыны гырысьджыкъясӧс... — шуис да уськӧдчис котӧртны...

— Эй, Чукля Сюр! Тэ абу на бура гӧгӧрвоӧмыд...

Мегарин бӧр локтіс Кӧза дорӧ.

— А мый? — сэсся видзӧдліс сумкаяс вылас да горӧдіс: — Гӧгӧрвои ӧні! Вай ӧти сумкатӧ меным...

— Вот ӧні бура гӧгӧрвоӧмыд!