РУК-РУК ДА КЫМӦР

Рук-Рук нима польӧпи петіс ӧшинь ув йӧрысь да мӧдӧдчис туй кузя. Асывнас ёнакодь зэрис да гӧпъясӧ пуксьӧма ва. Ӧні шондіа, гажа, жар. Рук-Рук кӧсйис полькӧдчыштны ва гӧптын, но матыстчис сэтчӧ да сувтіс. Видзӧдӧ ва гӧптас и аддзӧ: сэні вата кодь еджыд ёкмыльяс плавайтӧны. Тувкис нырнас, и еджыд ёкмыльясыс чеччавны кутісны.

— Мый ті тані вӧчанныд менам гӧптын? — юаліс Рук-Рук. Но сылы некод нинӧм эз вочавидз.

Котӧртіс Рук-Рук кычӧпи Шарик дорӧ да шуис сылы:

— Лок, Шарик, ветлам менам гӧп дорӧ... Сэні кутшӧмкӧ еджыд ёкмыльяс плавайтӧны...

Локтісны. Шарик гав-гав серӧктіс:

— Да тайӧ жӧ кымӧръяс плавайтӧны... Видзӧдлы енэжас: со мыйта найӧ.

— Кутшӧм енэжӧ? Ме сійӧс ог тӧд, эг аддзыв... Кӧні сійӧ?

— Вот чудакыд! Тэ чатӧртлы юртӧ, сэки аддзан...

— Ме ог вермы...

— Он кӧ вермы, мыш вылад, гатшӧн, водлы!..

— Да ме гатшнас ог вермы куйлыны.

— «Ог вермы... Ог вермы...» — нерис Рук-Рукӧс Шарик. А мый тэ верман? Сӧмын няйт пиын лукйысьны?! Но и лукйысь, колӧкӧ, — гав-гав увтыштіс да котӧртіс аслас чом дорӧ лы гарскыны.

Рук-Рук ещӧ кӧсйис видзӧдлыны кымӧр вылӧ, но шондіыс саялі и кымӧръясыс вошины...