ЗӦР ТУСЬЯС

Олісны-вылісны кык чавкан: Чав да Чив. Найӧ ичӧтсянь другасисны да частӧ волывлісны ӧта-мӧд дорас: то Чав мунӧ Чив ордӧ гӧститны, то Чивыс — Чав ордӧ. Пуксис кӧдзыд тӧв, и сёянӧн лои дзескыд. Ӧтчыд Чав важ эновтӧм складысь аддзис чуман тыр зӧр, — буракӧ, кладовщикыс вунӧдӧма сэтчӧ. Чавлы тайӧ и вӧлі колӧ, чумансӧ нуис гортас. Ӧні тшыг он кув, сёяныс дыр тырмас. Чавлы нимкодь, быд лун пӧттӧдзыс сёйӧ, а зӧр тыра чуман йылысь некодлы оз висьтав, весиг Чив другыслы. «Быдӧнлы кӧ кута сетавны, аслым оз коль» — думыштіс сійӧ да ставсӧ и сідзи ӧтнасӧн кокаліс-сёйис. Кор помассис, чумансӧ шыбитіс туй бокӧ, и сэтысь некымын зӧр тусь уси муас. Чав вӧлі пӧт, да на вылӧ весиг эз и видзӧдлы. Тайӧ тусьяссӧ аддзис Чив, чукӧртіс кулёкӧ да пыр жӧ лэбис Чав другыс ордӧ.

— Чолӧм-здорово, муса друг! Важӧн нин ми тэкӧд эгӧ аддзысьлӧй... Мый сэтшӧм жугыль? — юасьӧ Чив.

— Ме абу жугыль... — ньӧжйӧник вочавидзис Чав да бергӧдчис мӧдарӧ...

— Сёянтӧгыд, дерт, абу гажа... Ме гӧгӧрвоа... Со талун ме аддзи туй бокысь зӧр тусьяс да пыр жӧ локті тэ ордӧ... Вай ми сійӧс шӧри юкам да чӧсмасьыштам...

— Мем оз ков! — бордъяснас шпорӧдчыштіс Чав. — Тэ кӧ аддзин, сійӧ тэнад! Ачыд и сёй!

Чив чуймис, эз гӧгӧрво, мый лоӧма другыскӧд.

— Тэ ӧмӧй абу менам друг? Тэ ӧд аддзин кӧ, меным эськӧ вайыштін жӧ...

Чав нинӧм эз шу, сӧмын копыртіс юрсӧ. Сылы вӧлі яндзим аслас другысь.