ОТСӦГ

Арнас Кӧч стрӧитіс выль керка. Колис тэчны пач. Нывъясыс сёй талялӧны, йӧктӧны, а пияныс батьыслы отсасьӧны: коді кирпич пыртлӧ, коді кирпичсӧ мыччалӧ сылы. Уджыс пуӧ.

Выль керка дортіыс мунӧ Меж. Кӧч шыасис сы дорӧ: — Лок, Мегар, пач тэчны отсав... Шуӧны, тэ пӧ мастер... А ме первойысь пачсӧ тэча да, гашкӧ, оз артмы...

— Да-а ме-е мастер... Пачсӧ тэчны и жугӧдны верма... Но ӧні ог эшты.

Кӧч нинӧм эз шу, сӧмын зільджыка заводитіс уджавны. Регыд мысти пачыс вӧлі дась нин, и гӧтырыс пуис сэні ыджыд чугун тыр капуста шыд.

Меж кыліс ныриснас чӧскыд дуксӧ, весиг дулльыс петӧ. Локтіс кӧч керка дорӧ да ӧшинь пырыс шыасис:

— Эй, табъя кок! Помнитан, ме кӧсйи тэныд отсасьны?

— Помнита, — шыдсӧ панялігтыр вочавидзис Кӧч.

— Ме-е-е со локті шыдсӧ сёйны отсавны...

— Аттьӧ, Мегарин! Ме ӧні тэтӧг верма...

Кӧчпиян серӧктісны да зіля кутісны панясьны.