ПОВТӦМ КӦЧ

Коркӧ ӧтчыд Кӧч мӧдӧдчис сёян корсьны. Паныдасис сылы Кӧин.

— Эй, кӧсӧй бугыль! Кеж менам тр-р-рӧпа вылысь!.. — эргыштіс Кӧин. Сійӧ вӧлі пӧт да кӧсйис сӧмын повзьӧдны Кӧчӧс.

Но Кӧч весиг пельнас эз легнит, копыртліс юрсӧ, чолӧмасис Кӧинкӧд да муніс водзӧ.

Кӧин чуймис: «Мый пӧ тайӧ вӧчсьӧ свет вылас?

Меысь Кӧч эз кут повны?! Час, ме петкӧдла тэныд!..» Но кӧчлӧн и дукыс матын абу вӧлӧма.

Аскинас сійӧ жӧ трӧпа вылас Кӧчлы паныдасис Ош. «Бр-р-рысь менам туй вылысь!» — мурӧстіс Ош. Кӧч бергӧдчис сылань да юаліс:

— Мый ті шуинныд, Микайлӧ дядь? — сэсся лапанас тапкӧдыштіс Ошлы бокас да котӧртіс водзӧ.

— Кӧчыс йӧймӧма али мый? Дзикӧдз яндзимсӧ воштӧма... Да-а ме тэнӧ... — мурӧстіс Ош.

Ставсӧ тайӧс аддзыліс Катша да китшкис-висьталіс вӧрын ставыслы, кодӧс аддзыліс. Вӧрын паськалі сёрни, мый аддзысьӧма сэтшӧм Кӧч, коді ни Кӧинысь, ни Ошкысь оз пов. Повтӧм Кӧчлӧн славаыс паськаліс ӧдйӧ, быдӧн ошкисны сійӧс.

Кор Кӧч бӧр локтіс гортас, сійӧс виччысис нин став рӧдвужыс.

— Тэ молодеч миян... Некодысь он пов! — шуис Кӧчлӧн пӧрысь бабыс.

— Энлы, баб, энлы!.. Мый тэ шуин? Нинӧм ог кыв!.. — сэсся перйис кыкнан пельсьыс вата. — Тӧрыт дискотекаӧ ветлі да шумсьыс пельясӧс тупкылі... Вот ӧні бура кыла...

Кӧчлӧн дедыс эськӧ гӧгӧрвоис, мыйла внукыс эз повзьы Кӧинысь ни Ошкысь, но нинӧм эз шу. А мӧдыс ветлӧдліс тшапа, чатӧр юрӧн, — весиг мукӧд кӧчьяс вежалісны сылы.