ПЛОСКОВ! КЫЛАН?..

СТЕНӦ ӦШӦДАН ГАЗЕТЪЯС КОСЯВЛЫНЫ ОЗ ПОЗЬ.

МЕДЫМ КРЕСТЬЯНА ТӦДӦНЫ, КУТШӦМА УДЖАЛӦНЫ БӦРЙӦМ ЙӦЗ.

Мыйла Часса (Емдін уездын) волисполкомын юралысь — Плосков — косявлӧма стенӧ ӧшӧдан газет? (видзӧд «Югыд туй» № 107).

Со мыйла. Плосков зэв омӧля нуӧдӧ исполкомас уджсӧ. Кыкысь кымын нин сы йылысь гижлісны Часса стенӧ ӧшӧдан газетӧ. Плосковыд сӧмын вӧлӧм шуас: «Веськодь, газетыд ӧд оз чадит». Оз кӧ нӧ «чадит» вӧлі, мый морла эськӧ косявныс? Тыдалӧ, кольмымӧныс «чадитӧма».

Бӧръя газетас «Шонді югӧрӧ» вӧлі гижӧма Плосковлысь омӧля удж нуӧдӧмсӧ да кодалӧмсӧ. Вӧлӧм сійӧ нёль лунӧдз оз волы исполкомас. Друг ӧтчыд ковмӧма скод чукӧртны, председательыд некӧн абу. Корсьны сійӧс мунас ӧти шлен — Цывунин, дай ачыс вошӧ. Йӧзыд локталасны скод вылад, а ӧтик шлен весиг исполкомсьыд эз во. Вӧлӧмкӧ, «гӧститӧны». Та йылысь нӧ колӧ вӧлі чӧв овны, не гижны? Колӧ вӧлі гижны газетӧ! Гижӧмаӧсь, газетсӧ ӧшӧдӧмаӧсь лыддьысян керкаӧ.

Сы шӧрӧ-водзӧ (трустыд тай ваяс!) карсянь Часӧ воас кутшӧмкӧ контроль. Плосковыд уськӧдчас «Шонді югӧр» вылӧ, чашвартас-косялас.

— Мыйла нӧ косялін? — юаласны сэки.

— Оз позь! Контроль карсянь воӧма...

Тӧдчӧ тай, кутшӧм рӧч вӧлӧм Плосковыдлӧн юкалӧ!

Чайтіс, кӧнкӧ, газеттӧ косялӧмӧн вуштыштны ассьыс омӧль сямсӧ? Он сідзнад бурмы: шылатӧ мешӧкӧ он дзеб — мыччысяс.

Стенӧ ӧшӧдан газетъяс косявлысьясӧс колӧ чорыда судитны. Найӧ падмӧдӧны Сӧвет власьтлы да коммунист партиялы бурмӧдны сиктъясын Сӧвет удж нуӧдӧмъяс, кыпӧдны Сӧветса кӧзяйство.

Плосков ногӧн олысьяслы тайӧс оз ков вунӧдны, колӧ та йылысь бура тшупыштны ныраныс!

Жельнӧг.