АРСЯ ЛУНӦ

Звӧнитліс меным газетса редактор да корис гижны совхозса медбур механизатор йылысь очерк. Та могысь ме мӧдӧдчи Шорсай отделениеӧ. Матыса веськыд туй нуӧдӧ сэтчӧ вӧрті. Асывсяньыс луныс вӧлі зумыш, но кымӧръяслӧн руа эшкын пырыс писькӧдчис шонді, и ывлаыс пыр жӧ югдіс, лои гажаджык. Ме кайи Лунбок нӧрыс йылӧ да видзӧдлі сиктлань. Медводдза дорса керкаыс вӧлі Катерина тьӧтлӧн. Руд шифера керкаыс сылӧн ылісянь кажитчис паськыд корабль кодь — водзас дӧлаліс алӧйгӧрд парус. Тадзи ӧшинь улас вераліс кисьмӧм пелысь. Любӧ видзӧдны, мича!

Пыри вӧрӧ да чуймӧмӧн сувті: трӧпаыс эз вӧв. Шуны кӧ, сійӧ вӧлі, но тырӧма гылалӧм коръясӧн. Видзӧдан да синтӧ ёрмӧн вералӧны сэні виж, гӧрд, веж, чим гӧрд да уна пӧлӧс рӧма мукӧд коръяс. О, бура уджалӧма тані тӧлыс, абу, небось, яндысьӧма пасьтӧгыс пӧрччӧдны пуяссӧ, чорыда ыдждалӧма на вылын.

Мунан, восьлалан ньӧжйӧник, а ачыд вӧйласян небыд ковёрас. Коръяс вылас дзирдалӧны кӧдзыд лысва войтъяс, а нырад чамгӧ кутшӧмкӧ тӧдтӧм на кӧр, сэсся думыштан: тайӧ жӧ кӧрыс и тулыслӧн, и гожӧмлӧн, и аслас арыслӧн.

Петі эрд вылӧ. Тані Шорсай отделениелӧн заводитчӧны муяс. Гӧгӧр чӧв-лӧнь, а сійӧ пуксис неважӧн на. Ӧтар бокас жургисны тані КИР-яс, КСК комбайнъяс, ытшкисны силос вылӧ уна вося турунъяс, а ӧні сэні вежалӧ ӧтава, абу ньӧти кынмӧма. Мӧдарас — паськыд картупель му. Тані неважӧн на вӧлі гажа. Тракторъяслӧн да комбайнъяслӧн жургӧмыс сорласьліс студентъяслӧн сьыланкыв горӧн.

А ӧні чӧв-лӧнь! Кӧть шондіа, но сынӧдыс свежӧй, ыркыд.

Ме пукси мыр вылӧ куритчыны. Ӧвтіс важ бипур дукӧн да пӧжалӧм картупель кӧрӧн.

Пукала, кывзыся чӧв-лӧняс... И друг менам пельясӧдз, первойсӧ ньӧжйӧника, сэсся пыр гораджыка, енэжсяньыс воис дзодзӧгъяслӧн нора горзӧмыс. Ме чатӧрті юрӧс. Найӧ лэбисны шоныд муӧ, медым тулыснас бӧр воны чужан муас. Кӧть мый, а дзодзӧгъяс горзӧмысь быттьӧ шоныдджык лоис ывлаыс, гажаджык лоис муяс вылын.

Ме чеччи да мӧдӧдчи водзӧ аслам туйӧд.