ОШЛЬӦМ

Кутшӧм сӧмын пу оз быдмы миян вӧръясын. Ӧтиястӧг ми весиг огӧ вермӧй овны, мӧдъясӧн ми любуйтчам сылӧн мичлуннас да бурлуннас. Эмӧсь и сэтшӧм пуяс, кодъяс оз шыбитчыны синмад. Но абу, буракӧ, ни ӧти пу, коді оз сет мортлы пӧльза.

Ме радейта арся вӧр, радейта ветлӧдлыны сэті. Вӧрыс пасьтасьӧма зарни паськӧмӧн. Пуяс вылын коръясыс уна рӧмӧн вералӧны син водзад, пуяс дінӧ инмӧдчыны он лысьт, коръясыс гылалӧны муас, быттьӧ лэбӧны ӧнӧдз на аддзывтӧм-тӧдлытӧм лэбачьяс. Шы ни тӧв.

Мӧдджык серпас берег дорын. Тані ӧмидз да сэтӧр корйыс абу на вижӧдӧма, но тусьыс гылалӧма нин. Наысь крепыдджык вӧлӧма ошльӧм. Найӧ быдмӧны чукӧрӧн-чукӧрӧн. Ягӧдыс сылӧн, кыдзи и сэтӧрлӧн, кык пӧлӧс — сьӧд и гӧрд. Гӧрд ошльӧмсӧ мукӧдлаын шуӧны ошсэтӧрӧн. Видзӧднысӧ сійӧ зэв мича, тыдалӧ ылісянь. Чим гӧрд тусьясыс ӧшйӧмаӧсь гырысь розъясӧн, кыскӧны ас дінас — сідзи и окота кватитны да сюйны вомад. Но тӧда, сійӧс, кыдзи и сьӧдсӧ, оз сёйны. Помнита, менам дед, кор кайлім вотчыны, вӧлі аддзас гӧрд ошльӧм розъяссӧ да ӧлӧдӧ:

— Тайӧ ошльӧмыс, пиук, мича, но некор эн сёй... Сёян кӧ, пыр жӧ ошкӧ пӧран...

Дерт, ми, челядь чукӧр, ыліті кытшовтлім сылысь кустъяссӧ... Ошкӧн некодлы абу окота лоны. Тайӧ, дерт, вӧлі сӧмын шутка. Крестьянин бура тӧдліс сылысь тӧдчанлунсӧ.

Коркӧ ӧтчыд, ӧні нин, ме вунді ӧти роз да вайи гортӧ, час, мися, петкӧдла Ӧлдӧтья баблы. Сылӧн быдсяма лекарственнӧй туруныс эм, быд во найӧс чукӧртӧ.

— Бабуш, видзӧд, кутшӧм мича ошльӧм ягӧдыс, а мыйла сійӧс оз сёйны?

— Мыйла оз сёйны? — бабуш видзӧдліс ме вылӧ. — Кодлы колӧ, сёйӧны... Ми ӧд полам, а лэбачьяс сёйӧны и оз тай кувны... Сідзкӧ, бур сёян...

— А йӧзыс?

— А йӧзыс мыйла оз сёйны, ог тӧд... Курыд, кӧнкӧ... А войдӧр ёна вотлывлісны... Ӧні ӧд быдсяма порошокыд эм, а важӧн сійӧн пӧсуда чиститлісны... Ыргӧн самӧвартӧ вӧлі зыраласны ошльӧм ягӧднас да синтӧ ёрӧ, самӧварыд зарни моз дзирдалӧ... Ошльӧм — аслас пу рӧд. Сыысь, дерт, мегыр он син ни додь пӧлӧз он вӧч, а колана, кыдзи быд пу...

— Ӧні ӧд миян амбарад йӧртӧдъясыд тыртӧмӧсь... Няньтӧ лавкаысь ваям. Важӧн крестьяниныд тайӧ ошльӧмсӧ садитліс нянь амбар водзас. Сылӧн чорыд дукыс эз лэдз матыстчыны амбар дорас шыръяслы... Шуан, мыйла оз сёйны? Да ӧд быдтор он сёй... Вӧр-ваыслы мича ягӧдыс колӧ жӧ...