ШУШТӦМ КАД

Керкаӧй войнас кӧдзалӧма. Садьми водз да петі кильчӧ вылӧ, а сійӧ — еджыд, кыз гыӧра. Видзӧдлі ӧшинь улӧ — ӧтавасӧ сэтысь кодкӧ сакар пызьӧн киськалӧма. Муні карта сайӧ да видзӧдлі лун бок муяс вылӧ — турунсӧ пудритӧма жӧ кодкӧ.

Петіс шонді, кайис вылӧджык да кутіс бӧр вӧтлыны кӧдзыдсӧ, — видзӧд пӧ, локтӧма татчӧ сэтшӧм водз да ещӧ кӧзяйничайтӧ тані. Недыр мысти лун бок муяс и ӧшинь улын ӧтаваыс бӧр вежӧдісны, югдіс лӧз небесаыс. Сӧмын сэні, кытчӧ эз веськав шонді югӧрыс, важ моз вӧлі еджыд, гыӧра, а шонді водзын гожӧмын моз дзордзаліс катшасин. Тӧв и гожӧм орччӧн!

Шуштӧм кадыс воис и вӧрӧ. Пуяслӧн коръяс вижӧдісны, найӧс ӧні вӧрзьӧдны оз позь, пыр жӧ усьӧны, гылалӧны. Зэр тусь веськалас виж коръяс — сійӧ оз вермы кутчысьны, усьӧ. Пыста лэбалӧ увйысь ув вылӧ — корйыс гылалӧ быдса чукӧр. Инмӧдчан пипулӧн гӧрд корйӧ, корйыс коляс киад. Сьӧла кокаліс небыд пув, шорысь юыштіс да пуксис вугралыштны кыдз пу ув вылӧ, но кодкӧ юрас — чик! Тайӧ кыдз пуыслӧн ӧти кор уси сьӧлаыслы юр вылас, и сійӧ лэбис козъя вӧрӧ. Кӧч сӧмын пуксис шойччыштны куст улӧ, но коръясыс усигмозыс шарӧдчӧны. Кӧсӧй повзис да пышйис кытчӧкӧ.

Да, воис зверь-пӧткалы шуштӧм кад.