СЕРПАС

Таво арыс лышкыда юкліс ассьыс озырлунсӧ — тшак-вотӧс тырмис быдӧнлы — йӧзлы и зверь-пӧткалы. Ягын чӧв-лӧнь, оз нин кыв лэбачьяслӧн дзользьӧмыс. Сӧмын корсюрӧ вӧрса доктор вӧчас тук-тук, и бара лӧньӧ. Пуяс вылысь коръясыс гылалӧма, дзоридзьяс лёбзьӧмаӧсь.

Талун асыв чеччи югдігас на. Видзӧдлі ӧшиньӧд, — чорыда пужъялӧма. Весиг Катерина баблӧн керка вевтас пуд шиферыс лоӧма еджыд. Тӧлыс дугдывтӧг швичкӧ, ӧшинювса пуяслысь нетшкӧ бӧръя коръяссӧ.

Луннас тӧлыс друг лӧньыштіс. Час ме кайла Гӧрчак гӧра йылӧ да таво бӧръяысь видзӧдла тӧдса местаяс вылӧ.

Муяс вылын чӧв-лӧнь. Лунбокын важӧн нин кӧдзисны уна вося турун. Гыбад муяс вылысь идралісны картупель. Неважӧн на быттьӧ машинаяс да тракторъяс жуисны муяс вылын, — ӧні сэні тыртӧм. Машинаяс мукӧд удж вылынӧсь.

Гӧра йылын ме пукси кыдз пу улӧ. Арся рӧмыд лун. Енэжӧд уліті шлывгӧны руд кымӧръяс. Видзӧда гӧгӧр. Со сикт сайын чукльӧдлӧ-мукльӧдлӧ Мизин ю. Кодкӧ пыжӧн катӧ сиктлань, буракӧ, чери кыйны ветлӧма. Мизин пӧлӧн видзьяс вылын зорӧдъяс. Друг кыла: «Курлы-кур-лы!» Да тайӧ жӧ турияс. Налӧн шога горзӧмыс пыр матыстчис и матыстчис. Видзӧдлі вылӧ, енэжас. Сэні некод абу, сӧмын век ӧтмоза шлывгӧны руд кымӧръяс.

И друг, менам шуд вылӧ, енэжыс воссьыштліс, тыдовтчис кельыдлӧз лестук, и буретш сэті лэбис турияслӧн клиныс. Регыд бара саялісны кымӧръяс сайӧ, но налӧн нора горзӧмыс дыр на чуналіс менам пельясын. Аддзысьлытӧдз, тшап лэбачьяс! Ме бура гӧгӧрвоа тіянлысь шогтӧ, тіянлысь нор сьыланкывтӧ. Чужан му — овлӧ век ӧти. Регыд пуксяс кузь тӧв.