ПИР

Арыс таво локтіс тэрмасьӧмӧн, ассьыс уджсӧ вӧчис зіля, нюжмасьтӧг. Мукӧд воясӧ тайӧ пӧранас сулалӧ кос шоныд поводдя, кыдзи шуласны — «бабаяслӧн гожӧм». Первой зэрис, сэсся заводитіс кынмавны. Кадысь водз гылалісны пуяс вылысь коръясыс, пуяс колисны кушӧсь, пасьтӧмӧсь, зато вӧрын муыс веж рӧмсӧ вежис виж вылӧ — вольсасис усьӧм коръясӧн. Гылалісны не сӧмын пуяслӧн коръясыс, но и ягӧдъяс. Тшак ни ягӧд он нин вот.

Сэсся бӧр пуксис ясыд, но ыркыд поводдя.

Ми Юлякӧд мунам Сьӧд тыӧ вуграсьны. Векньыдик трӧпа нуӧдӧ шор бокті. Шорыс абу ыджыд, но гораа дзольгӧ-визувтӧ аслас туйӧд. Берег пӧлӧныс кӧнсюрӧ сатшкысьӧмаӧсь бадь пуяс, на костті чургӧдчӧмаӧсь сэтӧр кустъяс, а наысь бокынджык, вылынджык, кузя паськӧдчӧмаӧсь ошльӧм кустъяс. Ми лэччим дзик шорас: колӧ видлыны чӧскыд кӧдзыд васӧ, да бидонӧ сьӧрысь босьтыштны. Юля чибльӧгӧн гумлалӧ бидонӧ васӧ, а ме сулала да кывзыся. Кыла, кодкӧ быттьӧ ошльӧм кустъяс дорын дзуртӧ, кыдзи тӧлын кӧдзыд дырйи юж туй вылын додь сюв. Гашкӧ, чегӧм кос пу? Коді вермас лоны? Перйи футлярысь бинокль да кайи вылӧджык. Ой, да тайӧ жӧ жонь! Гожӧмын эз вӧв, а кытыськӧ воӧма, буракӧ... Алӧйгӧрд морӧса, со сійӧ ӧтнасӧн пукалӧ ошльӧм ув вылын, качайтчӧ да сьылӧ. А мыйла сійӧ ӧтнасӧн?

Пока Юля вайис ва да ме юи, ӧтка жонь дорӧ локтӧма быдса кельӧб. Колӧ чайтны, сійӧ вӧлі разведкаын, да чуксаліс-корис ас дорас мукӧдсӧ.

Интереснӧ, ме таті недель кык сайын на прӧйдитлі, и кутшӧм мича, гажа тані вӧлі. Ошльӧм увъяс вылас, пелысь моз жӧ, ӧшалісны гырысь-гырысь чим гӧрд розъяс. Гӧрд рӧмыс синтӧ ёрӧ, ылысянь тыдалӧ. Мича-мича серпас! Ӧні кустъясыс вӧліны кушӧсь. Кор сэтчӧ локтіс жонь стаяыс, кустъяс быттьӧ бӧр ловзисны, увъяс вылас быттьӧ бара ӧшйисны гӧрд-гӧрд розъяс. Сэсся лэбачьяс вошины: ӧти бӧрся мӧд тювисны-лэччисны муас да кутісны пируйтны, кокавны усьӧм ягӧдсӧ. А ягӧдыс вӧлі уна-уна, кустъяс улас наысь муыс вӧлі гӧрд сера. Жоньяслӧн збыльысь вӧлі пир.