ПЕЛЫСЬ ПУ

Дзик на неважӧн тайӧ пелысь пуыс сулаліс тшапа, ошйысьліс аслас мичлуннас. Корсюрӧ небыдика шпорӧдчыліс-ворсліс аслас веж коръяснас, а коръяс пиас ӧзйисны яръюгыд гӧрд розъяс. Нинӧм он шу — мича, любӧ видзӧдны.

Но кутшӧмкӧ кык-куим лунӧн арся тӧлыс нетшкис-орйӧдліс сылысь гӧрдӧдны нин удитӧм коръяссӧ, и мича пуыс коли пасьтӧмкодь. Сійӧ сулаліс ӧні зумыша, и сӧмын кор уськӧдчывліс тӧв ныр, увъясыс розъяснас сьӧкыда бовъявлісны, быттьӧ корисны отсӧг. Пашкыр кыдз пу, кодкӧд орччӧн сулаліс пелысь пуыс, отсавны эз вермы, ачыс кынмис-тіраліс. Но кӧть кутшӧм шуштӧм эз вӧв пуыслы, сійӧ оліс, кортӧм увъяс вылас ӧзйисны син ёран гырысь да сьӧкыд розъяс. Розъяс быд тусь вӧлі гырысь, зэлыд, шыльыд, дзирдаліс яръюгыда. Кыскис ас дорас арся скуп шонді югӧръяссӧ да ворсіс наӧн. Мед кӧть и вӧлі кортӧм, но сулаліс, быттьӧ сійӧс нарошнӧ вӧлі мичмӧдӧма гӧрд розъяснас.

Пелысь пу сулаліс важ мельнича туйбокса неыджыд эрд вылын. Ме частӧ таті ветлӧдлі. Ӧтчыд сы дорті мунігӧн ме друг шемӧсми: видзӧда и ог эскы аслам синъяслы. Сылӧн быд ув вылын вӧрисны уна-уна сьӧдовруд ёкмыльяс — пелыськайяс. Найӧ крепыда кутчысьӧмаӧсь гыжъяснас увъясас да кокалӧны пелысь тусьяссӧ. Налӧн сьӧктаысь пу увъясыс бовъялісны, вот-вот чегасны.

Кор ме матыстчи да сувті пусяньыс неылӧ, лэбачьяс быттьӧ команда серти дугдісны кокасьны, кыпӧдісны юрнысӧ, видзӧдлісны ме вылӧ, сэсся друг жбыркнитісны-лэбисны.

Матыстчи пу дінас. Сы вылӧ видзӧдны ӧні вӧлі жаль. Эз нин тыдавны син ёрысь чим гӧрд розъяс. Сӧмын кӧнсюрӧ ӧшалісны ӧтка-ӧтка тусьяс, кодъясӧс абу удитӧмаӧсь кокыштны. Пуыс ӧні сулаліс йӧжгыльтчӧмӧн, жугыля, дзик пасьтӧм, быттьӧ абу вӧвлӧма сылӧн неважӧнся на мичлуныс. Кутчысь, друг. Выль тулыс ваяс тэныд выль мича паськӧм!