КУЗЬ ТУЙ ВОДЗЫН

Скворечьяс — зіль лэбачьяс. Найӧ медводдзаяс лыдын локтӧны чужан муас, вайӧны сьӧрсьыс шоныд лунъяс, югыд войяс. Кызвынсӧ овмӧдчӧны сиктъясын, налы тӧдса скворечникъясын, быдтысясны сэні, сэсся челядьыскӧд, скворечпиянкӧд, лэбӧны матысса вӧръясӧ, муяс да видзьяс вылӧ.

И со воис ар. Частӧджык кутіс зэрны. Вӧрын лои уль руа. Пуяс заводитӧны гожся веж паськӧмсӧ вежны зарни рӧма виж паськӧм вылӧ. Сэки вӧрын шоча нин кывлӧ лэбачьяслӧн сьылӧмыс, найӧ чукӧртчӧны ыджыд кельӧбӧ да ӧтвылысь лӧсьӧдчӧны лэбны тӧвйыны лунвылӧ, шоныдінӧ. Ӧти кельӧбӧ чукӧрмывлӧ сё кымын лэбачӧдз. Лэбӧм водзвылас найӧ локтӧны асланыс позъяс дорӧ, медым нӧшта ӧтчыд видзӧдлыны рӧднӧй местаяс вылас, прӧщайтчыны сыкӧд.

Миян кыдз пу вылӧ найӧ локтісны асывнас, кыа пӧртмасигӧн. Скворечьяс параясӧн пуксялісны кыдз пу увъяс вылӧ, мукӧд пуяс вылӧ. Кодсюрӧ на пиысь лэбалісны увйысь увйӧ да горзісны ассьыныс «чирр, чирр!».

Друг ӧти сквореч гора чирӧстіс, чеччыштіс скворечник вылӧ, бергӧдчис петысь шонділань, шпорӧдчыштіс бордъяснас да гораа заводитіс сьывны. Быд ногыс горзіс, чирзіс, дзуртіс, шутьляліс. Сы бӧрся заводитісны сьывны и мукӧдыс. Пельыд чуналӧ налӧн гора сьылӧмысь. Сьылісны ӧд не сӧмын миян ӧшинь улын, но и сиктын, мукӧдлаын. Тайӧ вӧлі налӧн прӧщайтчан сьыланкыв, сійӧ эз вӧв кыпыд, гажа, кутшӧм овлӧ тулыснас, а нор, жугыль.

Колис мыйкӧ дыра кад, и сійӧ скворечыс, коді заводитіс медводз сьывны, бара аслысногӧн гораа чирӧстіс да лэбзис поз вывсьыс. Мукӧдыс вӧтчисны сы бӧрся. Найӧ неуна кытшлалыштісны сикт весьтті да «чирр-чирр» горзігтыр лэбисны лун бок муяс вылӧ.

Вот тадзи быд во. Скворечьяс пияныскӧд лэбисны вӧрӧ, и ӧнӧдз эз волыны на сиктӧ. А шоныдінӧ лэбӧм водзвылас век жӧ воласны поз дорас, пуксясны да сьылӧны бӧръя сьыланкывсӧ, прӧщайтчӧны рӧднӧй позйыскӧд, тӧдса местаяскӧд.

Дзик жӧ сідзи, кыдзи тӧдса роч сьыланкывйын.

Присядем, друзья, перед дальней дорогой,

Пусть легким окажется путь.

Аски найӧс он нин аддзыв.