ӦТИ АСЫЛЫН
Ми Андрейкӧд вуграсим бонаяс вывсянь Сыктыв дорын. Вой кежлас сувтӧдім ичӧтик брезент-палатка да узьмӧдчим. Друглӧн отпускыс помасис и сылы окота вӧлі бӧръя войсӧ коллявны ывла вылын бипур дорын. Варовитім вель дыр, казьтылім важсӧ, томдырся ёртъясӧс, война, кӧні ми вӧлім кыкнанным, но разнӧй фронтъяс вылын. Ывлаыс пемыд-пемыд, кӧть синмад сутшкы, нинӧм он аддзы. Рытывбыдӧн кык-ӧ-куимысь шонтылім чай. Водім сёрӧн нин, вой шӧр бӧрын коркӧ. Асывнас, югдігас нин, миянӧс садьмӧдіс лыйсьӧм шы. Гып! Гып! Гып! — кылӧ школӧдісны кӧнкӧ. Унйывсьыд ми повзимкодь да ырскӧбтім-петім палаткаысь, — эг пыр гӧгӧрвоӧй, мый лоис, кӧні коді лыйсьӧ.
— Ыджыд ты дорын, — неуна сайкалыштӧм бӧрын гӧгӧрвои ме. Сэсся друг мыйкӧ кутіс сынӧдас шувгыны. Ми кыпӧдім юрнымӧс: ми весьтті лэбис утка чукӧр, гашкӧ, дасысь унджык. Лэбисны Кузь тылань. Уткаясыс ӧні, буракӧ, чукӧртчӧны кельӧбӧ, медым лэбны тӧвйыны шоныдінӧ.
— Да талун жӧ медводдза кыйсян лун! Кылан, мый гӧгӧр вӧчсьӧ? — горӧдіс Андрей да пырис палаткаӧ папиросла.
Андрей эз на удит бӧр петны, кыдзи заводитісны школӧдны Кузь ты дорын. Недыр мысти уткаяс бӧр лэбисны миянлань. «Уськӧдісны эз бара?» — вирдыштіс менам юрын.
— Эй, уткаяс, уткаяс! Энӧ лэбӧй Ыджыд тыас, виасны! — ӧта-мӧд вежмӧн горзім ми Андрейкӧд. И уткаяс, быттьӧ кылісны миянӧс, вежисны туйвизьсӧ да веськӧдчисны Пашня нюрлань. Кузь тыын лыйсьӧмыс лӧнис.
Пузьӧдім чай. Сӧмын пуксим юны, кыдзи Ыджыд ты дорын бара заводитісны шковгыны-лыйсьыны. Тайӧ пӧрйӧ ми весьтті лэбисны кык утка. Виисны эз бара? Гашкӧ, кык пара вӧлі? Найӧ эз лэбны Кузь тыӧ, а пуксисны Мизин вомӧ.
Недыр мысти утка пара кыпӧдчисны сынӧдас вылӧкодь, лэбисны водзӧ корсьны пӧдругаяссӧ. Бара кыліс залп, мӧд... Мый бара вӧчсьӧ? Кымын ружье ӧти утка вылас? Колӧ-ӧ тадзи? Недыр мысти Ыджыд ты дорын лыйсьӧмыс лӧнис, но кутісны лыйсьыны водзынджык. Сідзкӧ, уткаяс прӧйдитісны засадасӧ... Ме весиг ӧні рад вӧлі лыйсьӧм вылас, — лыйсьӧны, сідзкӧ, уткаяс ловъяӧсь. «Кыпӧдчӧй вылӧджык кельыдлӧз енэжас... Сэки некутшӧм дрӧб оз босьт!» — думӧн тшӧкта налы.
Шонді кайис вылӧкодь нин. Корсюрӧ пӧльыштліс асыв-вой тӧв. Чери мыйлакӧ эз кут сёйны, ми чукӧртчим да мӧдӧдчим гортӧ.
