ЗАРНИ КОВЁР

Войнас ме друг садьми. Кыла: тракйысьӧ-ружтӧ радиопровод, лёкысь жуньгӧ. Ӧшинь улын пессьӧны кыдз пу да льӧм пу, став вынсьыс водзсасьӧны чизыр тӧлыслы. Асъявылыс тӧлыс лӧнис, и менам сэки бӧр унмовсьысьӧма. Асывнас менӧ чуксаліс Юля.

— Чеччы, узьысь Вань, талун ывлаыс мича, шондіа. Чай юам да, гашкӧ, вуграсьны ветлам?

Ме ырскӧбті-чеччи. Збыль, ывлаыс вӧлі мича, шондіа, лӧнь.

Ме босьті тыртӧм ведраяс да мӧдӧдчи юкмӧс дорӧ вала. Петі кильчӧ вылӧ и чуйми: ӧшинь улӧ кодкӧ вольсалӧма уна рӧма зарни ковёр. Кутшӧм рӧмӧн сійӧ сӧмын оз верав! Чорыда уджалӧма войнас тӧлыс! Коръяс вылас лӧсталӧны лысва войтъяс.

Пуяс пӧшти пасьтӧг кольӧмаӧсь. На вылӧ ӧні весиг жаль видзӧднысӧ. Ме ӧд аслам синъясӧн аддзылі, кыдзи гаръясисны пуясыс, кыдзи потісны коръясыс, нимкодясьлі, кор дзоридзалісны льӧм пу пелысь пу. Аддзылі, кыдзи найӧ паныдавлісны да колльӧдлісны асъя да рытъя кыаяс, кыдзи на вылын радлісны-сьылісны лэбачьяс.

Ме сулалі кильчӧ вылын да думайті, кытчӧдз эг кыв Катерина баблысь гӧлӧссӧ.

— Мый, Петрович, любуйтчан зарни ковёрнас? Полан воськовтны?

Ме нинӧм эг шу, сӧмын лэптылі киӧс, чолӧмаси.

Колӧ чайтны, сійӧ и сідз гӧгӧрвоис менсьым думъясӧс.