ОЗ СИК

Гожӧмнас ме кайи Ыджыд ягӧ оз вотны. Оз позь шуны, мый озйыс эз вӧв. Ветлӧдлі да ӧкті тусьӧн-тусьӧн. Сэсся друг веськалі ӧти неыджыд мыльк вылӧ, кодлӧн лун бокыс вӧлі чим гӧрд, быттьӧ сэтчӧ павкнитӧма дзоридзьяса ыджыд гӧрд эшкын. Озйыс вӧлі уна, ставыс ӧтсяма, пев пом кодь гырысьӧсь, зэвтчӧмаӧсь. Видзӧда и любуйтча: вотны али не вотны? И вотны жаль, и татчӧ кольны жаль. Нетшышті медыджыд озсӧ, исалышті кӧрсӧ — юрыд кольмӧ. Вомад сюян — ставсӧ вунӧдан.

Воті сэтысь озтӧ. Мылькйыс вӧлі гӧрд, а лоис веж.

Коркӧ сёр арнас нин, кор ме бӧръяысь кайи тшакла, бара веськалі важ тӧдса местаӧ... Но сё дивӧ! Менам тӧдса мылькйыд бара гӧрдӧдӧма. Озйыс мӧдысь петӧма али мый? Ме чуймӧмӧн веськӧдчи сэтчӧ. Но озйыс, дерт, эз вӧв. Вӧлӧмкӧ, арыс краситӧма озйыслысь быд кор, и мылькйыс гожӧмын моз вӧлі гӧрд, быттьӧ сэні пӧртмасисны уна-уна оз тусь.