СЕРА УДЖ

Ыджыд ягысь ми трӧпаӧд петам туй вылӧ. Юля друг сувтіс да кутіс видзӧдны ас водзас.

Мый сійӧ аддзис? Матыстчи сы дорӧ. Трӧпа пӧлӧныс сулалісны сыв судта понӧльяс. А дзик трӧпа дорас, ӧтар-мӧдарас, быттьӧ часӧвӧйяс — кык ичӧтик коз пу. Соседъясыс серти найӧ ичӧтджыкӧсь. Кыкнанныс, буракӧ, ӧти восяӧсь, дзик ӧтсудтаӧсь, пемыдвеж лыска паськӧмаӧсь. А йывъясыс кыкнанныслӧн лӧсталӧны, быттьӧ тугансяньыс улӧ кисьталӧма найӧс кельыдлӧз порошкиӧн.

И со мый сэні вӧлӧма. Тайӧ кык козпиян костас черань кыӧма вез, быттьӧ туйсӧ нарошнӧ потшӧма. Везйыс неуна лэччыштӧма муланьыс, ӧшйӧма, мыйкӧ, буракӧ, кыскӧ. Сідзи и эм. Везъяс ӧшйӧмаӧсь виж коръяс, руд да веж лыс емъяс, сэтчӧ жӧ лясӧма посни лысва войт. Рытъя шонді югӧръяс улын найӧ ворсӧдчӧны уна рӧмӧн, быттьӧ артмӧдӧны ӧшкамӧшка.

А кӧзяиныс ачыс абу. Гашкӧ, и дзебсис.

— Мича ӧд серыс? — мелань бергӧдчис Юля.

— Мича... Сера удж...

Ми кытшовтім сійӧс да мӧдӧдчим водзӧ.