ЗЭРИГӦН
Войбыд шливгис-зэрис. Корсюрӧ зэр тусьясыс швачӧдісны ӧшиньӧ сідзи, быттьӧ таркӧдісны барабанӧ. Асывнас лӧньыштіс, муртса сӧмын войтасис. Ме надейтчи, мися, кобас да мӧдӧдчи ягӧ. Улӧдз ӧшйӧмаӧсь кымӧръяс. Ягӧд ветлӧдлыны талун абу любӧ: вылісянь век ӧтмоза войтасьӧ кӧдзыд зэр, бокъясад — кӧтасьӧм пуяс, инмӧдчан на дінӧ, киссяс тэ вылӧ содзтыр ва. Кок улад — кыз лысва, ва туруныс да няйтыс чавкакылӧны. Ва гӧпъясын сёльӧдчӧ зэрыс.
Талун вӧрын, буракӧ, некод абу, гӧлӧсъяс оз кывны, сӧмын зэрыс шарӧдчӧ пу коръяс вылын. Оз кывны и лэбачьяс, буракӧ, ставыс дзебсьӧмаӧсь зэрсьыс.
Ме вота тшак. Тшакыс уна. Гӧгӧр сярвидзӧны уртшакъяс. Кытчӧ сӧмын найӧ оз петны! И коръя вӧрын, и пожӧма ягын, и нюрын, и кос местаясын. Зэрыс найӧс мыськӧма да вӧччӧмаӧсь быттьӧ праздник кежлӧ. Кутшӧм рӧмаыс сӧмын абу?! Кытчӧ он видзӧдлы, сэні и сярвидзӧны и гӧрд, и виж, и руд и алӧй шляпаяс. Чукӧрӧн-чукӧрӧн петӧмаӧсь гӧрд путникъяс, иванчикъяс, масленикъяс. Но талун найӧс ме ог босьтав. Талун ме корся сӧмын рыжикъяс. Тӧда, найӧ ёнджыкасӧ быдмӧны шоч понӧля вӧрын, но пырны сэтчӧ талун абу окота, дзикӧдз кӧтасян. Думыштан, кыдзи сьыліад веськалӧ кӧдзыд лысваыс, да йирмӧг босьтлӧ: бр-р-р!!! Но век жӧ смелмӧдчи да кежи понӧльяс костӧ. И эг весьшӧрӧ. Со ӧти пу улӧ дзебсьӧмаӧсь некымын рыжик. Шляпаясыс — пемыдгӧрд рӧмаӧсь, быттьӧ сімны заводитӧмаӧсь. Видзӧдӧны ме вылӧ да чӧв олӧны. Со ещӧ ӧти чукӧр, мӧд, коймӧд... Мед кӧть и зэрӧ, но век жӧ нимкодь.
Регыд козъя вӧрыс помасис, да петі неыджыд эрд вылӧ, кӧні кышакылісны кыдз пуяс, пипуяс. Ывлаыс быттьӧ югдіс. Тані паныдасьлӧны еджыд и гӧрд гобъяс, мичаӧсь, ёнӧсь. Но талун кежлӧ, буракӧ, тырмас. Окота лои тешитӧма. Да и кӧрзинаӧй рыжикӧн пӧшти тыр. Дзикӧдз кӧтаси, паськӧмӧй шпоракылӧ. Кӧть ме и брезент плаща дай нейлон курткаа, век жӧ ваыс йиджтысьӧма пельпомъясӧдз. Пукті кӧрзинаӧс мыр бокӧ да куті пыркӧдчыны. Оз нин зэр. Ме ӧзті сигарет да пукси мыр вылӧ. Пукала, шойчча, а орчча пу вывсянь кыліс: «Пинь, пинь!» Тайӧ пинькай шыасис. Чатӧрті юрӧс, енэжас сыръя дора кымӧръяс костті тыдалісны кельыдлӧз лестукъяс. Сідзкӧ, регыд мичаммас, петас шонді. Гашкӧ, та йылысь и юӧртіс меным сюсь лэбачыс?
