ЛОВЪЯ ДЗОРИДЗ

Мизин ю заводитчӧ кӧнкӧ Пуклан сиктсайса ылі нюръясын, писькӧдчӧ лунвылӧ да миян сикт дорын усьӧ Сыктылӧ. Юыс зэв чукыльӧсь, уналаын артмӧдӧ кӧджъяс. Юас, кӧні джуджыдджык да абу визув, сук бадь пу кустъяс улын дӧлалӧны мича-мича еджыд дзоридзьяс — запанкияс. Мыйла тадзи сійӧс шулӧмаӧсь, код тӧдас?.. Дзоридзыс быттьӧ ловъя, паськыда восьтӧма синъяссӧ да азыма видзӧдӧ лун югыдас, апалӧ ас пытшкас мелі шонді югӧръяссӧ, сӧстӧм сынӧдсӧ. Небыдик лун тӧв лайкйӧдлӧ найӧс ва вылас, а найӧ быттьӧ нюмъялӧны берег дорті ветлысь-мунысьяслы, вӧзйӧны налы ассьыс мичлунсӧ. Мича дзоридз! Тэныд эськӧ кывтны юӧдыс да радуйтны йӧзлысь синъяссӧ. Но кывтны он вермы: якӧрассьӧмыд ва пыдӧсас. Он кӧсйы эновтны ассьыд чужан местатӧ, радейтана ютӧ.

...Ми Юлякӧд кайлім ичӧтик пыжӧн Мизин пос дорӧ подольникъяс видлыны. Ӧні бӧр кывтам гортлань. Юля пидзӧсчань вылас сулалӧ пыж нырын да ӧлӧдӧ менӧ:

— Кеж бокӧджык! Эн кучкы пелыснад ловъя дзоридзьяслы!

Сійӧ менам молодчина, вель уна нин тӧдмаліс ывла вывлысь аслыссяма гусяторъяссӧ.

...Рытнас, шонді лэччигӧн, запанкияс куньӧны ассьыныс синъяссӧ, тупкысьӧны вой кежлас. Тадзи налы, гашкӧ, бурджык коллявны арся кузь войсӧ. Но асывнас бара восьтасны, — шевкнитасны еджыд синбордъяссӧ, медым любуйтчыны олӧмнас да гажӧдны йӧзсӧ.