АРСЯ СЬЫЛАНКЫВ

Менӧ корлісны Шорсай отделениеса клубӧ. Сэні вӧлі войнавывса ветеранъяслӧн том йӧзкӧд аддзысьлӧм. Сёрниті и ме, а бӧрас лыдди война йылысь некымын висьт. Помасьӧм бӧрас подӧн мӧдӧдчи гортӧ и некымын ныв да зон колльӧдісны менӧ шор дорӧдз. Сэні прӧщайтчи да мӧдӧдчи ас сиктӧ веськыд туйӧд вӧр дорті. Рытыс шоныд, лӧнь, весиг тӧвру оз ворс. Рытъя кыаыс вочасӧн доналӧ, вот-вот шондіыс саялас, гӧгыльтчас вӧртас сайӧ. Вӧрын шы ни тӧв. Татшӧм мича рытнас лэбачьяслы эськӧ уна пӧлӧс гӧлӧсӧн сьывны да сьывны, но найӧ чӧв олӧны. Сӧмын кутшӧмкӧ ӧти лэбач «чив, чив» горӧдліс, но сылы некод эз вочавидз, и сійӧ бӧр ланьтіс. Тулыс-гожӧмнас налӧн уджыс вӧлі уна, сьӧкыд, найӧ мудзисны да ӧні шойччӧны. Да и ассьыныс пайсӧ, майбыр, сьылісны. Регыд найӧ лэбасны тӧвйыны шоныдінӧ, а ӧні чӧжӧны выннысӧ.

Кӧнкӧ туй бокын, ситурун пӧвстын, шарӧдчӧ-сьылӧ чирк. Сылӧн сьыланыс кузь, но абу нин гожся моз ярскӧб, лэчыд гора, кутшӧмкӧ ньӧжмыд, гажтӧм, быттьӧ сійӧ жалитӧ, мый сэтшӧм ӧдйӧ колис гожӧмыс. Жалитӧ югыд войяссӧ, кор сійӧ войбыд эз ланьтлыв да шойччывтӧг ворсліс-сьыліс. А ӧні пемдӧ водз, и колӧ удитны на сьывны ассьыс помтӧм сьылансӧ.

Ме гӧгӧрвоа лэбачьяслысь шогсӧ, тӧждлунсӧ. Меным на моз жӧ сьӧлӧм вылын неуна гажтӧм сыысь, мый колис гожӧмыс, мый кыдз пуяс вылын петкӧдчисны нин виж коръяс, мый ывла вылыс регыд ставыс вижӧдас, рудмас, пемдас. Талун кӧть и рытыс мича, гожӧмын кодь шоныд, но век жӧ воис ар. Да, воис ар, збыль ар.