ШОНДІ ВИЧЧЫСИГӦН
Ме узьмӧдчи важ чомйын, коркӧ сійӧс вуграсьысьяс вӧчлӧмаӧсь. Лыскыс косьмӧма да унджыкыс гылалӧма нин. Асывнас лои кӧдзыд да ме садьми, пиньяс сӧмын зяткакылӧны. Юр улысь босьті плащ да шебраси сійӧн, но шонавны некыдз эг вермы. Лои чеччыны да петны чомйысь. Бипур, дерт, войнас кусӧма, а бӧр ӧзтыны ог вермы — истӧгӧй бырӧма. Куті котравны, чеччавны, киясӧн шлапӧдны бокъясӧ. Эг нин кут сэтшӧма тіравны, но пытшкӧсӧн век на кыла кӧдзыдсӧ. «Ок эськӧ сук пӧсь чай ӧні!» — думышті, но кытысь босьтан сійӧс.
Босьті вугыр шать да лэччи берег дорӧ. Кӧдзыд лысвасьыс туруныс еджыд, быттьӧ гыӧра. Куті самасьны, но ог вермы, киӧй дзӧрӧ. Пӧлялі киӧ, сэсся век жӧ кыдзкӧ самалі пучӧйӧн да вӧйті лапкоръяс бокӧ. Ачым чеччала да думайта: мыйла талун сы дыра шондіыс оз пет? Ещӧ чеччышталі и аддза: мӧдар берегас вижӧдӧм пу йывъяссӧ алӧй краскаӧн мавтыштісны, найӧ югдісны. Сэсся сійӧ югыдыс вочасӧн пыр лэччис улӧджык и улӧджык, со и став берегыс шондіа нин. Сэні, лыа вылын, зыксьыны кутісны каляяс. Шыасисны лэбачьяс. Сэні, майбыр, шондіа, лӧсьыд налы, шоныд... Вуджны эськӧ сэтчӧ да нинӧмӧн. Ок, эськӧ пыж кӧ вӧлі?! Лэбачьяслы, небось, лӧсьыд: кытчӧ окота, сэтчӧ и лэб...
Кияс век на кынмӧны. Вугыр шатьӧс сатшки муас, киясӧс сюйи зептӧ, чабрала, а ачым ветлӧдла берегӧд да виччыся шонді: дыр-ӧ нин оз лок татчӧ? А сійӧ век матынджык и матынджык. Со нин менам берегын пу йывъяс югдісны, сэсся и шонді югӧръясыс лэччисны нин юӧдз, со нин табйӧй купайтчӧ шонді югӧръяс пиын. Меным нимкодь: регыд лоӧ шоныд. А кутшӧмкӧ лэбач шонтысьӧ нин коз пу йылын да тӧрытъя моз жӧ заводитіс тшетшкыны меным:
— Шеді эз? Шеді эз?
Ме бергӧдчи да видзӧдлі сы вылӧ, но нинӧм эг шу. Коз пу йывсяньыс сійӧ лэбис кыдз пу вылӧ да пӧдругаясыскӧд бара заводитіс дэльӧдчыны:
— Шеді эз? Шеді эз?
Ӧвтышті киӧн да бӧр бергӧдчи вугыр шатьлань. Видзӧдлі таб вылӧ — сійӧ абу. Ме уськӧдчи да кватиті вугыр шатьӧс. Лэптышті, сійӧ зэлыд. Сибдіс али мый? Ещӧ лэптышті, кыла, кодкӧ табсӧ новлӧдлӧ. Ещӧ лэптышті, тыдовтчыліс сой кызта сынлӧн сьӧд мышкуыс. Веськыда лэптыны оз позь, лескаыс орас. Ме сійӧс ньӧжйӧник вайӧді берег дорӧ да сакышті. Ура! Сыныс менам! Ме кута сійӧс киын да любуйтча: татшӧм ыджыдыс меным некор на эз шедлы! Ок, эськӧ, петкӧдлыны кодлыкӧ, ошйысьыштны!.. А ме дорын некод абу.
Ме сійӧс мезді вугырысь и друг сійӧ тракнитчис, мыні менам нильӧг киысь да дзумгысис-усис ваас. Ме шемӧсми, жальысла муртса синваӧй оз пет. А тӧдтӧм лэбач сераліс ме вылын да век ӧтмоза эльтчис:
— Шеді эз! Шеді эз!
