КУРЫД СИНВА

Пӧтап ягӧ пыранінын, дзик Мизин берег дорас, сулалӧ пӧрысь коз. Синмӧ шыбитчӧ сійӧ быдӧнлы, коді мунӧ сы дорті. И оз сы вӧсна, мый сійӧ медся джуджыд да медся кыз. Медводз синмад шыбитчӧ сылӧн ки пыдӧс пасьта еджговат-виж тшупӧд, коді гартчӧ-лэччӧ пучер пӧлӧныс. Кырсьыс пуыслӧн рана улас кульыштчӧма, и сы пыдди чургӧдчӧмаӧсь-петкӧдчӧмаӧсь моль кодь гӧгрӧс сир курыд синва войтъяс.

Пӧрысь коз пу ньӧжйӧник шувгӧ да бӧрдӧ, быттьӧ сылӧн быд лыс норасьӧ ветлысь-мунысьяслы аслас олӧм вылӧ: видзӧд пӧ, мый мекӧд лоис.

А лоис сідз, мый коз пу йылас чорыда кучкис чардби, чегис тугансӧ, сэсся, пучер гӧгӧрыс гартчиг, тювис-лэччис увлань да сатшкысис-пырис муас.

А пӧрысь коз эз кув. Сійӧ век на сулалӧ да шувгӧ аслас местаын. Сулалӧ кыдзи памятник да казьтылӧ ветлысь-мунысьяслы, мый чардби век кучкӧ медся джуджыдінӧ.