КОДЛӦН ЛЭБАЧЫС?
Карса гӧстьяскӧд ми вуграсим Сьӧд тыын. Сійӧ абу ыджыд, но местаясын зэв джуджыд, ваыс векни вискӧд тюрӧ Мизин юӧ. А тыас усьӧ войвывладорса нюрсянь неыджыд шор. Лун и вой сійӧ ӧтмоза сёльӧдчӧ-ворсӧ, писькӧдчӧ тыас. Тайӧ шор дорас ме радейта вуграсьны. Тыыс зэв чериа. Тані эмӧсь сиръяс, ёкышъяс, кельчияс, йӧршъяс, весиг сюравлӧны сынпиян да ляпаяс. Берег пӧлӧныс — лыска вӧр, а дзик берег дорас сатшкысьӧмаӧсь бадь пуяс. Ягас поздысьӧны тулыс-гожӧмнас уна пӧлӧс лэбачьяс. Водз асывсянь оз ланьтлы налӧн сьылӧм-сёльгӧмыс.
Кодкӧ гӧстьяс пиысь горӧдіс:
— Вай биасям да пусям...
Ми Юлякӧд кайим берегас да биасим.
Регыд мысти чӧсмасим нин свежӧй юкваӧн. Муртса на пуксим да заводитім панясьны, матысса понӧль вылӧ пуксис пинькай.
— Пинь! Пинь! Пинь! — чолӧмасис миянкӧд. Сійӧ лэбаліс пуысь-пуӧ миян гӧгӧр да гораа сьыліс. Вӧрын, торйӧн нин берег дорын, ӧні абу гажтӧм, быдлаын кылӧ налӧн сьылӧмыс. Кӧнкӧ чирксӧ сырчик, тюрӧдӧ-горзӧ пелыськай; нюрас кӧнкӧ баксіс енмеж. Но найӧ ылынӧсь, вӧрас сьылӧны, а пинькайыс дзик миян дінын, миянлы сьылӧ, а ми кывзам сійӧс. Лэбач вочасӧн збоймис, лэччис да пуксис миян дорӧ матӧ, а кор сёян коляссӧ вештыштім бокӧджык, пуксис пӧрт дорышас да кутіс кокасьны. «Молодеч», — думайта.
Кор менам другъяс кутісны лыскысь вӧчны вой кежлас шалаш-чом, лэбач матыстчис «пызан» дорӧ да кутіс октыны нянь крӧшкияс. Дзикӧдз збоймис.
Миянсянь неылын тыдаліс ичӧтик палатка. Сэні овмӧдчӧмаӧсь, буракӧ, карсаяс. Кор Юлякӧд ми мунім песла, кежалім на дорӧ. Найӧ, вӧлӧмкӧ, быдса семья: гозъя да налӧн дас кымын арӧса детинка. Буретш юӧны чай.
— Чолӧм тіянлы! — шыаси ме. — Чай да сакар!
— Чолӧм! Пуксьӧй. Чай миянкӧд юам, — корисны миянӧс.
— Аттьӧ... Ми сӧмын на «пызан» сайысь, — вочавидзи ме.
Ӧттор-мӧдтор баитыштӧм бӧрын, ме кӧсйи нин мӧдӧдчыны водзӧ, друг Юля горӧдіс:
— Видзӧд, видзӧд, миян пинькайыд тані нин!
Лэбач котраліс чай юысьяс дорын да кокасис.
— Тайӧ абу тіян, а миян лэбачыс! — горӧдіс детинкаыс. — Сійӧ тӧрытсянь нин миян дінын олӧ...
— Ладнӧ. Мед тіян кӧ и тіян, — шуис Юля да ми мунім пес корсьны.
