ӦБИДИТЧИС

Сук козъя вӧрын кузь турун пӧвстті ньӧжйӧник визувтӧ ичӧтик шор. Пӧрӧм пу потшӧма сійӧ шорсӧ, и ваыс пу дорас кодйӧма ичӧтик гӧп. Гӧптас бовъялӧ чибльӧг. Кодкӧ вотчысьяс пиысь, буракӧ, вӧчӧма чибльӧгсӧ, пуктӧма ва гӧптас, и ӧні сійӧ плавайтӧ чача-корабль моз.

Шор бокӧдыс туй вылӧ петкӧдӧ трӧпа. А дзик трӧпа бокас сулалӧ неыджыд кыдз пу. Тайӧ сылӧн лым кодь еджыд пучерсьыс кульыштӧмаӧсь чибльӧг вылӧ сюмӧдсӧ. Пуыслӧн веж коръя увъясыс ёна нин нюжалӧмаӧсь, лэччысьӧмаӧсь и ранаыс сылӧн пӧшти оз нин тыдав.

Ветлӧдлӧны тайӧ шор пӧлӧныс вотчысьяс. Юӧны тані кӧдзыд васӧ, пожъялӧны чужӧмсӧ да аттьӧалӧны кыдзсӧ. Но сійӧ чӧв олӧ. Оз кӧсйы вунӧдны важся ӧбидасӧ, мый сійӧс ранитісны.