ИЗ

Кык лун чӧж чорыда зэрис. Керкаын пукавны дӧзми нин. Думайта, гашкӧ, зэр бӧрад кутшӧмсюрӧ тшак петіс? Чуксалі Юляӧс да шуа сылы:

— Вай босьт ассьыд кӧрзинатӧ да ветлам Паськыд ягӧ, видзӧдлам, мыйкӧ эм абу сэні?! Паськыд яг — пожӧма яг. Тшака воясӧ сэтчӧ уна рыжик петавлӧ. Ягтіыс ми ветлӧдлім вель дыр, гашкӧ, час-мӧд. Сюри миянлы дас кымын рыжик да мыйкӧ мында гӧрд гоб. Буракӧ, абу на тшак вотан кад.

— Менам горшӧй косьмӧ, — друг шуис Юля да нюлыштіс вом доръяссӧ.

— Верма тэнӧ гӧститӧдны, — вочавидзи ме.

— Кыдзи тэ гӧститӧдан, кор васӧ ми эгӧ босьтӧй?

— Лок инӧ ӧтилаӧ ветлам, гашкӧ, мыйкӧ и аддзам...

Ягысь ми петім важ пашня дорӧ. Тані ми дедкӧд век шойччывлім. А вот мыйла пашняӧн шулӧмаӧсь, ме ӧнӧдз на ог тӧд. Но тӧда, мый сэтчӧ некор нинӧм абу кӧдзлӧмаӧсь. Местаыс сэні зэв изйӧсь, а дзик вӧр дорас зымвидзӧ (сывнад он судз!) зэв ыджыд из. Изйыс — зэв шыльыд, быттьӧ мастеръяс нарошнӧ мольӧдӧмаӧсь. Дзик вылысыс пӧв кодь веськыд, а шӧрас тасьті кодь гӧптор. Мыйыс сӧмын лун югыдас оз овлы?! Дивӧ дивӧ и эм! Гожӧмнас, кор кӧть он волы, тасьтіас век эм мыйтакӧ ва. То ли лысваысь чукӧрмӧ, то ли зэр бӧрын. А ӧні видзӧда — чукйӧн тыр. Ю, пӧжалуйста, веськӧд горштӧ. Войнас изйыс ыркалӧма и ваыс вель кӧдзыд, кӧрыс чӧскыд, быттьӧ вӧрса дзоридзьясӧн сулӧдӧма.

— Аттьӧ тэныд, ыджыд из. Бара чӧскыд ванад гӧститӧдін...