ТОМ БЫДТАСЪЯС
Тӧдлытӧг колис тулыс, пуксис гожӧм — жар кад. Быдмисны да ёнмисны лэбачьяслӧн пияныс. Нэриник бордъяс крепаммисны, и видлісны ассьыныс вынсӧ, кыпӧдчылісны, вылісянь видзӧдлісны чужан му выланыс. Кутшӧм жӧ мича да ыджыд чужан муыс: сійӧ ставнас лӧсталӧ веж, визьйӧдлӧма юяслӧн лӧз лентаясӧн, туйяслӧн руд визьясӧн. Туйяс да юяс пӧлӧн сулалӧны чача кодь керкаяс.
Со панласьӧны нин бать-мамыскӧд скворечпиян. А шумыс мыйта! Найӧ вежон сайын на вӧліны асланыс дзескыд керкаын, ӧта-мӧдсӧ выджигтыр сюйсисны ӧшинь розь дорӧ, медым кӧть син пӧвнас видзӧдлыны, мый вӧчсьӧ лун югыдас. Найӧ лёкысь горзісны да вомсӧ паськӧдӧмӧн виччысисны бать-мамныслысь сёян-юан. А ӧні со асьныс лэбалӧны да корсьӧны сёян.
Позъяс тыртӧммисны. Ӧні скворечпиянӧс позьӧ аддзыны сӧмын муяс вылысь, видзьяс вылысь, берег дорысь, вӧрса эрдъяс вылысь. Лунвылӧ лэбзьытӧдз найӧ воласны чужан сиктас, видзӧдласны ещӧ, медым не вунӧдны сійӧс.
Сиктын, керкаяс да пывсянъяс гӧгӧр, жбыръялӧны сырчикъяс. Бать-мамыслы нимкодь, мый быдтісны зіль да пельк челядьӧс. Сырчикъяс лэбалӧны лайкыда, оз тракйысьны, велӧдӧны быдтасъяссӧ кутавны гут-гагӧс лэбигас. Ӧні ёнмӧдчӧны, лӧсьӧдчӧны ылі туйӧ.
Водз асывнас либӧ сёр рытын, кор ю весьтӧ ӧшйӧ еджыд ру, позсьыс петкӧдӧ ва вылӧ ассьыс челядьсӧ утка-горда. Сійӧ герчкигтыр тшапа восьлалӧ-катласьӧ, а быдтасъясыс люзьгӧны сы бӧрся сьӧрсьӧн-бӧрсьӧн. Уткаяс — зэв визувӧсь: найӧ и лэбалӧны, и плавайтӧны, и сунласьӧны. Уткапиян ва вылын дурӧны-ворсӧны, а коді пелькджык, кавшасьӧ мамыс мышку вылӧ да сэтысянь сунӧ ваас. Ва вылас жӧ утка-мам велӧдӧ и лэбавны.
Сьӧд ракаяс асьныс — уджач, зіль лэбачьяс. Но овлӧны налӧн дышысь-дыш пиян. Пукалӧ татшӧмыс му вылын, тушанас бать-мамыс ыджда жӧ, тракйӧ юрсӧ да лёкысь горзӧ: «Кра, кра!» — сёйны пӧ вай. Кад нин эськӧ сылы аслыс корсьны сёянсӧ, но оз кӧсйы, надейтчӧ бать-мамыс вылӧ.
Но бать мамныс и татшӧм дышъяссӧ век жӧ тшӧктӧны вӧрны. Босьтасны вомас ыджыд нидзув, петкӧдлӧны пиыслы, сэсся чеччалӧны-пышйӧны сы дорысь, сэсся неуна лэбышталӧны. Быдтасыслы быть вӧтчы мамыс бӧрся, кынӧмыд ӧд сюмалӧ. Ковмас и котӧртыштны, и лэбыштны.
Войвылын гожӧмыд дженьыд. Абу кокни быдтысьны пӧткаяслы, быдторйыс овлӧ. Но век жӧ гожӧм помын нин найӧ быдмӧны дзикӧдз, петӧны асшӧр олан туй вылӧ.
