СЬӦЛА ПОЗ

Ми Юлякӧд вуграсим Сьӧд тыын. Сёйис талун бура. Вугыртӧ сӧмын вӧйтан, а табйыд бара нин вӧрӧ. Ывлаыс жар, тӧв чир абу. Кыйӧм чериыд ӧдйӧ небзьӧ. Ми вӧлі лӧсьӧдчам нин мунны, друг миян дорӧ машинанас локтіс Андрей, менам важся тӧдса да друг. Локтӧма абу ӧтнасӧн, а семьянас. Вӧлӧмкӧ сійӧ пыралӧма миян ордӧ гортӧ, а гортсаяс висьталасны кӧнӧсь ми, и пыр жӧ машинасӧ веськӧдӧма татчӧ. Местаыс сылы тӧдса, эг ӧтчыд сыкӧд тані вуграсьлӧй. Машинаас вӧлӧма сылӧн чери кыян быдса бригада: Галя гӧтырыс, Коля пиыс да Наташа нылыс.

Мый вӧчан? Ковмис кольччыны, пуны юква да гӧститӧдны найӧс. «Ладнӧ, рытнас чериыс бара кутас сёйны. Та мындатӧ бара на кыям!» — шуис меным Юля да муніс челядьыскӧд берег дорӧ чӧдлач вотны. Андрей гӧтырыскӧд мыйкӧ ноксисны машина дорас, а ме шуи кытшовтны матігӧгӧрті, тӧдмавны, кӧні мый петӧма да быдмӧ. Гожӧмнас татысь вотлам чӧдлач, и чӧд, и оз, и сьӧлаоз. Нюр дорасджык — пув розъясьӧ. Кӧнсюрӧ кисьмӧма нин оз. Заводиті ӧктыны оз тусьяс. Шонді водзад воӧмаӧсь нин, гырысьӧсь. Ӧти, мӧд, коймӧд... Кружкаӧй менам регыдӧн и тыри. Нӧшта ӧктышта кос увъяс дорысь и муна, — думышті. Матыстчи сэтчӧ, ӧктыся, а нявда улас тыдалӧ уна, манитӧ тэнӧ. Нюжӧді киӧс и чуйми: ме вылӧ видзӧдісны кык ичӧтик син, кык ичӧтик сьӧд тусь. Медым не повзьӧдны лэбачӧс, ме бӧрыньтчи бӧр.

Ме локті чом дорӧ. Андрей пузьӧдӧма нин чай. Чай юигад менам и шусис, мый ме аддзи сьӧла поз. Юля и Коля пыр жӧ шызисны: вай петкӧдлы и ставыс. Юля босьтіс фотоаппарат да мунім. Сьӧла куйліс век на сідзи. Ме пидзӧсчаняси нявда дорас, а Юля снимайтіс позсьыс сьӧласӧ. Челядь колины дӧвӧленӧсь: оз быд лун удайтчыв снимайтны татшӧм матысянь лэбачӧс. Ме ӧлӧді челядьӧс, медым сэсся оз мунны лэбач поз дорӧ. Нинӧмла сійӧс повзьӧдлыны.

Ывлаыс ыркӧдыштіс, лунся жарыс прӧйдитіс. Регыд позяс заводитны вуграсьны.

Машина дорысь локтіс Галя нылыскӧд. Юля да Коля, дерт, пыр жӧ ошйысисны, мый снимайтісны позъяс сьӧлаӧс. Ме видзӧдлі на вылӧ, найӧ ланьтісны, зато Галина эз лэччысь: «Ставӧн аддзылісны сьӧла поз, а Наташа эз... Карын сійӧ мыйӧн кутас ошйысьны?.. Вай петкӧдлӧй тшӧтш Наташалы...»

Мый вӧчан, лои тшӧтш нывкатӧ нуӧдлыны поз дорӧ. Первой найӧ видзӧдісны ылысянь кодь, сэсся Наташа матыстчис ме дорӧ да шуӧ:

— Позьӧ малыштны сійӧс?

— Эн вӧрӧд, оз позь, — повзи ме.

Пока вензим, Наташа кодакӧ кості ачыс нюжӧдӧма кисӧ сьӧла дорӧ да малыштіс сійӧс. Сьӧла, буракӧ, кутіс, кутіс асьсӧ, кор сы дорын бергалісны йӧз, но кор инмӧдчисны сы дорӧ киӧн, терпитны выныс эз тырмы: друг жбыр лэбис Наташа ныр увті. Нывка повзис да бӧрддзис. Галя, сьӧласӧ видігтыр, нуӧдіс сійӧс чом дорӧ. Ме муні на бӧрся и виді ачымӧс, мыйла нуӧді найӧс поз дорас?! Ӧні колӧ вӧлі сӧмын надейтчыны, мый сьӧла такалыштас да бӧр воас аслас позйӧ.

Рытнас ме бара ветлі поз дорас, но сэні сьӧлаыс эз вӧв. Узим ты дорын, важ чомйын. Аски асывнас ме бара ветлі поз дорас, но сьӧла эз вӧв, сідзи и эновтӧма позсӧ. А сэні вӧлі сьӧд чутъяса нёль руд кольк. Найӧ вӧлі кӧдзалӧмаӧсь, и наысь некор нин оз петны сьӧлапиян.