ЧӦД РОЗ

Ӧтчыд гожӧмнас ме ордӧ карысь локтіс аслас машинаӧн Андрей, менам бур друг. Ме сійӧс кӧсйи нуӧдлыны вуграсьны Ыджыд тыӧ, — сэтчӧ ва дорӧдзыс сибалан машинаӧн. Но другӧй эз сӧгласитчы.

— Ыджыд тытӧ ми тэкӧд бура тӧдам. А талун, другӧ, ме тэнӧ нула сэтшӧм местаӧ, кӧні тэ некор на эн вӧвлы. Вай лӧсьӧдчы, ме пета да машина видзӧдла.

Час джын мысти нин ми петім сиктысь, и «Запорожец» кежис Пуклан туй вылӧ. «Сідзкӧ, Мизин йылӧ ком вугравны...» — думышті ме. Сиктсянь неылын миянлы паныдасис челядь чукӧр — нывкаяс да зонкаяс. Шуйга кианыс налӧн быдӧнлӧн вӧлі бидон либӧ туис. Дозйыс быдӧнлӧн, буракӧ, тыр. Мӧд, веськыд кианыс, китырыс кабыртӧмаӧсь чӧд розъяс, да мунігмозыс вомнас ӧктӧны тусьяссӧ. Пиньясыс да вомныс сьӧдасьӧмаӧсь, кодсюрӧлӧн и бандзибъясыс лякӧссьӧмаӧсь.

Андрей сувтӧдіс на дінӧ машинасӧ да юалӧ:

— Вотчыны ветлінныд? Бу-ур! Чӧдъя йӧлӧн чӧсмасянныд...

Сэсся ӧти детинкалысь корис ӧти чӧд роз да юалӧ:

— Мича ӧд? А дыр-ӧ чайтан олӧны тайӧ розъясыс, кодъясӧс ті нетшкинныд?

Челядь шӧйӧвошисны, оз тӧдны мый шуны. Тайӧ дядьӧыс юаліс кӧ эськӧ, кытчӧ мунӧ тайӧ туйыс, либӧ ылын-ӧ орчча сиктӧдз, — найӧ эськӧ радпырысь висьталісны, а то чӧд роз!? Вӧрас, майбыр, сійӧ уна, кӧть косаӧн ытшкы...

— Онӧ тӧдӧй, сідзкӧ? — бара юаліс другӧй.

Сэки ӧти детинка, медся ичӧтыс, вом дорсӧ чышкалігтыр шуис:

— Ӧти во, кӧнкӧ.

— Эн сӧр... Дерт, тэныд ӧти во... Во куим, кӧнкӧ, — горӧдіс мӧд. Кыптіс вен.

— Оз куим, а вит во.

— Дас во...

Некод эз тӧд, дыр-ӧ олӧны чӧд розъясыс. Веськыда кӧ шуны, ме и ачым эг тӧд... Окота лои тӧдмавны...

Андрей петіс машинасьыс да матыстчис челядь дорӧ.

— Некод онӧ тӧдӧй, а ещӧ школьникъяс. Вот тайӧ розъяссьыс, гашкӧ, дедъясыдлӧн батьясыс на вотлісны чӧдсӧ. Чӧд кустъясыс олӧны кыксё воысь дырджык... Сідз жӧ, кыдзи чӧдлач да пув коръяс.

Челядь чуймисны.

— Вот тайӧ да! — горӧдісны да быттьӧ команда серти ставӧн видзӧдлісны чӧд розъяс вылас. Видзӧдісны сідзи, быттьӧ первойысь найӧс аддзӧны.

— А ӧні думыштӧй, мыйта чӧд на вермисны сетны йӧзыслы тайӧ розъясыс, кодъясӧс ті нетшкинныд...

— Да... Ми гӧгӧрвоим... Сэсся ог кутӧй нетшкыны!.. — вочавидзис нывка да дзебис мышкас розъяссӧ.

— Вот и сёрнитчим, сідзкӧ, — шуис Андрей, сэсся пуксис машинаас да мӧдӧдчим водзӧ.