ШОНДІ ДА ЗЭР

Июль помын да август заводитчигӧн лун дас сулаліс зэв жар поводдя. Мизин ю ямис, пидзӧсӧдз лоис, кӧнсюрӧ шӧрас тыдовтчисны изъя діяс. Нярмисны дзоридзьяс, бадь увъяс ӧшйисны ва весьтӧ. Оз жбыръявны лэбачьяс, найӧ ланьтӧмаӧсь шондітӧминъясӧ. Зумыша сулалісны пуяс.

Шы ни тӧв. Ва весьтын сӧмын жбыръяліс планер моз юрсигусь, да кӧнкӧ ситурун пиын шарӧдчис чирк. Йӧзыс думайтісны, мый татшӧм кос поводдяыс пӧ ещӧ сулалас неделя кымын, ставыс сотчас. Сотчасны град выв пуктасъяс, картупель, косьмасны посни юяс да шоръяс.

Ӧтчыд, пажын бӧрын, войладорсянь пӧльыштіс тӧв. Сійӧ вайис ыджыд сьӧд кымӧр, коді первой тупкис шондісӧ, сэсся енэжсӧ ставнас. Чорыда сяркнитіс гым. Ӧтчыд, мӧдысь, коймӧдысь... Кутіс шливгыны шоныд зэр, кисьтіс ведраысь моз. Сэсся кымӧръяс кыдзи локтісны, сідзи и мунісны водзӧ. Бӧр петіс шонді. Ывлаыс син водзын вежсис. Бӧр югзисны, юрнысӧ кыпӧдісны дзоридзьяс, бӧр лыбисны бадь увъяс, кыпыда лолыштісны пуяс, бӧр вежӧдісны град выв пуктасъяс, ытшкӧм видзьясвывса ӧтава, гораммис лэбачьяслӧн гӧлӧсыс, найӧ пыркӧдчисны-купайтчисны ва дорын да ва гӧпъясын. Сынӧдыс лоис свежӧй, кокни лолавны.