ЮГЫД ВОЙЯС

Лунъясыс лоисны сэтшӧм кузьӧсь, мый подӧн он суӧд сылысь помсӧ. А лӧз енэжын лӧсталӧ жар шонді, кывтӧ-кывтӧ аслас туйӧд да гажӧдӧ олӧмсӧ. Шонді улын ставыс вежсьӧ, быдмӧ, ёнмӧ и муяс вылын, видз вылын, и вӧр-ягын.

Но луныс кӧть и кузь, помыс сылӧн век жӧ волӧ. Шонді час-мӧд кежлӧ саявлӧ вӧртас сайӧ, но ывлаын югыд, ем пысавны верман.

Видзӧдан, шондіыс лэччис, а рытъя кыаыс пӧртмасьӧ-ӧзйӧ, зільӧ вочаасьны асъяыскӧд. Ставыс лӧнис, лунъя удж бӧрын шойччӧны. Но оз ставыс узьны, — ывла вылыс олӧ. Со сквореч лэбалӧ ӧтарӧ-мӧдарӧ, картупель му вылын корсялӧ гагъясӧс да ваялӧ найӧс позъяс пияныслы. Со живкъялӧны керка гӧгӧр чикыш пара. Кутшӧмкӧ лэбач сьылӧ льӧм пу вылын. А кадыс мунӧ-котӧртӧ. Сылысь мунӧмсӧ лыддьӧдлӧ кӧнкӧ Парчӧгын кӧк: ку-ку, ку-ку! Сыктыв берег дорын, бадь кустъяс дорын, енэжас качӧ вӧсни визьӧн лӧз тшын: тайӧ сэні челядь вуграсьӧны.

Со вой шӧр кад нин, а век на югыд. Сыктыв дорса Ыджыд ты вывсянь кыпалӧ да разалӧ видзьяс вылын небыдик еджыд ру, быдмӧгъяс вылӧ пуксис лысва. Мунан кӧмтӧгыд — кокъясыдлы ыркыд. Сьӧлӧм вылад кыпыд, лӧсьыд! Он ӧд весьшӧрӧ виччысь татшӧм кадсӧ тӧвбыд!

А кадыс лэбӧ водзӧ. Со Гӧрчак гӧра йылын енэжыс заводитіс нин пӧртмасьны алӧйгӧрд рӧмӧн. Эз-ӧ тайӧ войпуканінысь воысь волшебнӧй ныв уськӧд сэтчӧ ассьыс мича дзоридзьяса алӧй чышъянсӧ да тӧлыс паськӧд-разӧд гӧра йылас? Гашкӧ, и тадзи. Алӧйгӧрд визьыс век паськалӧ, содӧ...

Заводитісны чилзыны-сьывны лэбачьяс. Садьмисны водз, дыр шойччыны налӧн кадыс абу. Найӧс, дерт, позьӧ гӧгӧрвоны: гожӧмыд миян войвылын дженьыд, колӧ удитны быдтыны пиянсӧ, сувтӧдны найӧс кок йылӧ.

Ставыс шызис-ловзис ывла вылын! Шонді заводитіс вӧчны выль ыджыд да кузь кытш.

Кӧкӧй, кӧкӧй, матушка кӧкӧй! Висьтав, кымынӧд час нин! Ку-ку, ку-ку, ку-ку! Куим?! А век жӧ кутшӧм дженьыдӧсь ті, тувсов югыд войяс!

Дона друг! Эн дышӧдчы, волы Сыктыв берег дорӧ, пӧттӧдз чӧсмась ма кӧра чӧскыд сынӧднас, мыссьы эзысь рӧма лысваӧн да чышкысь мича алӧйгӧрд кыа ки чышкӧдӧн!