КОДІ ВЕСЬКӦДІС КОРЪЯССӦ?
Ми Юлякӧд мӧдӧдчим Иван сотчӧмӧ, — тадзи миян шуӧны сиктбердса матысса ягсӧ. Тайӧ ягыс коркӧ важӧн нин, войнаӧдз на, сотчылӧма пӧшти ставнас. Сотчӧма сэки и, стӧчджыка кӧ шуны, кусӧдчигас пӧдӧма тшын пиас Иван дед, уджач, зіль мужик. Сы паметь кузя ӧні ягсӧ шуӧны Иван сотчӧмӧн.
Ӧні сотчӧминас быдмӧма выль мича яг. Ыргӧн пучера джуджыд пожӧмъяскӧд вывлань, енэжлань, нюжӧдчӧмаӧсь кыдз пуяс, пипуяс, ловпуяс, козъяс. Татчӧ кыдзкӧ веськалӧмаӧсь и льӧм пуяс да пелысь пуяс. Ягыс сӧстӧм, татысь ни ӧти пӧрӧдӧм либӧ пӧрӧм пу он аддзы, сы вӧсна мый йӧзыс видзӧны, дӧзьӧритӧны тайӧ ягсӧ.
Тані тырмымӧн вотӧсыд быдмӧ, челядь гожӧмбыд котралӧны татчӧ. Ягыс чӧсмӧдӧ найӧс ознад и сьӧлаознад, чӧдлачнад и чӧднад, пувнад и намырнад... А татчӧс рыжикысь кындзи, кӧнкӧ, чӧскыдджыкыс некӧн абу.
Ягас пыран туй пӧлӧн синтӧ ёрӧны уна сикас дзоридзьяс, а бокынджык, увтасінынджык, сярвидзӧ дука турун — папоротник, — быдса плантация, быттьӧ нарошнӧ кӧдзӧмаӧсь сэтчӧ. Инмӧдчылан сы дінӧ — нырад чамгӧ чорыд дук. Таысь сійӧс и лудік турунӧн на шулывлӧны.
Ме матыстчи на дорӧ, видзӧда: мый нӧ тайӧ? Дзоридз ув вожъясас сатшкысьӧмаӧсь гырысь турунвиж лёльӧяс... Да сымында ещӧ!.. Копыртчи, бурджыка видзӧдлі. Вӧлӧмкӧ, найӧ абу лёльӧяс, а коръясыс гаровтчӧмаӧсь трубкаӧ. Видлі веськӧдны ӧтиӧс, нинӧм оз артмы: разьлан и бӧр гаровтчӧ. Локтіс Юля, видліс, но вӧчны нинӧм жӧ эз вермы. Зіль не зіль, а коръясыс бӧр гаровтчӧны и ставыс. Асылыс шондіа, мича, ывлаас шоныд, но мыйла коръясыс оз веськавлыны? Сідзи и дука турунлы ми эгӧ вермӧй отсавны да мунім водзӧ.
Лун кык мысти кымын луннас ми бара веськалім сэтчӧ. Видзӧдам и шензям: дука туруныд шевкнитӧма сыръя доръяса паськыд веж коръяссӧ. На вылын ӧти гаровтчӧм кор эз вӧв.
Мунігмоз Юля сьылӧ да юасьӧ:
— Коді отсаліс быдмӧгыслы веськӧдны коръяссӧ?
Паныдасис пелысь пу. Сы вылын пукалісны пыстаяс. Ӧти кодкӧ на пиысь шутёвтіс:
— Ми эгӧ аддзылӧй...
Мунам водзӧ. Ылькнитіс небыдик тӧвру. Юля юаліс сылысь.
Тӧвру пӧльыштіс:
— Ме эг кывлы...
Локтім шор дорӧ. Юим кӧдзыд сӧстӧм васӧ, но и сійӧ эз висьтав. Сёльӧдчигтыр вашнитіс:
— Ме ог тӧд.
А шонді вӧлі вылын да чӧв оліс.
