ТУЙ НУӦДӦ ВОДЗӦ...

Тулыс садьмӧдіс вӧр-васӧ, ышӧдіс лэбачьясӧс. Найӧ сьылӧны асывсяньыс рытӧдзыс, рытсянь асылӧдзыс. Майбыр, войяс оз пемдыны, ов да гажӧдчы. Ме муна векни трӧпаӧд, любуйтча свежӧй вӧр-ванас, кывза лэбачьяслысь сьылӧмсӧ. Яръюгыд шондіысь, сӧстӧм сынӧдысь, лэбачьяс сьылӧмысь меным долыд, сьӧлӧм вылын кыпыд, окота тшӧтш горӧдны сьывны. А мый збыльысь горӧда кӧ? Ӧні ягас некод абу, лэбачьясысь кындзи, а найӧ оз дивитны, гӧгӧрвоасны менӧ.

Ме кайи мыр вылӧ да горӧді:

— Э-э-э-й-й!

— Э-э-э-й-й-й! — кузя вочавидзис меным тувсов гора йӧлӧга.

Трӧпа нуӧдӧ менӧ водзӧ. Сійӧ катӧдіс менӧ мыльк вылӧ, кӧні шувгисны ыргӧн пучера кузь пожӧмъяс. Сысянь кӧсйи нин бӧр бергӧдчыны, но водзын, трӧпа весьтын, югдыштіс. Мый сэні? Колӧ, дерт, видзӧдлыны... Матыстчи. Вӧлӧмкӧ, ичӧтик ты. Ты гӧгӧрас, салдат-часӧвӧйяс моз, сулалӧны коз пуяс, пожӧмъяс. Ты бокӧдыс муна водзӧ. Паныдасис ичӧтик шор, усьӧ буретш сійӧ тыас. Трӧпа вуджӧ шор мӧдарас. Кодлӧнкӧ тӧждысяна ки пӧрӧдӧма шор вомӧныс кык кер. Вуджи. Лэччи берег дорас. Шорас ваыс кӧдзыд, югыд, сяльӧдчӧ-варовитӧ пуясыскӧд визувтігмоз. Бадь пу вылысь босьті чибльӧг, юышті, чӧсмаси чӧскыд ванас. Ыджыд аттьӧ тэд, тӧдтӧм шорӧй! Туйыс катӧ шор пӧлӧныс, сійӧ нуӧдӧ менӧ водзӧ и водзӧ видзӧдлыны аддзывтӧм на местаяс, тӧдмавны вӧр-ва йылысь выльторъяс. Туй век нуӧдӧ водзӧ...