КУЗЬ НЭМ ТІЯНЛЫ!

Ме муна важ тӧдса трӧпаӧд. Гӧгӧр пуяс, пуяс... Вӧрыс югдӧма, абу нин гажтӧм. Эрдъяс вылын лымйыс сылӧма нин. Трӧпа бокӧдыс, кытчӧ веськалӧ шондіыс, лымйыс кӧнсюрӧ сылӧма жӧ, но пуксьӧма, сьӧдасьӧма, — тувсов тӧлыс нӧбӧдӧма сэтчӧ кос кольяс, кырсьторъяс. Лэбачьяс абуӧсь на. Вӧрын шы ни тӧв, лӧнь. Пуяс кывзӧны тулыслысь лов шысӧ, виччысьӧны сійӧс.

А со и менам тӧдса места — неыджыд эрд. Ме радейта тайӧ местасӧ, ветліг-мунігӧн частӧ кежавла татчӧ. Тані эрдыс во-мӧд сайын на вӧлі куш, ни ӧти пу эз вӧв, а ӧні со быдмӧны сыв кузьта кымын томиник пуяс. Найӧ ставныс томӧсь, свежӧйӧсь, кыпыдӧсь, сулалӧны и радлӧны лун югыдыслы. Том пуясыс уна. Эрд дорланяс быдмӧны пожӧм да козпиян. Веж лысъяссӧ найӧ чургӧдӧмаӧсь, быттьӧ дорйысьӧны кодыськӧ. Шӧрланяс мыйлакӧ петӧмаӧсь коръя пуяс — кыдзьяс, пипуяс, весиг кытыськӧ палгысьӧма татчӧ пелысь пу. Веськыда кӧ шуны, татчӧ веськалӧмаӧсь пӧшти став сикас пуясыс, кутшӧмъяс эмӧсь миян вӧрын.

Локтан татчӧ гожӧмын кӧть тӧлын, видзӧдлан томиник стройнӧй пуяс вылас, любуйтчыштан наӧн, и тэныд кажитчӧ, мый ачыд томмылан, волан аслад челядьдырйӧ. Кузь нэм тіянлы, томиник пуяс.

Томъяслысь эрдсӧ кытшалӧны гырысь пуяс — козъяс, пожӧмъяс, кыдзьяс, — найӧ видзӧны томъяссӧ.