КӦЧПИЯН

Микол дядь — лесник. Тайӧ удж вылас сійӧ пырис война вылысь локтӧм бӧрын и пыр на уджалӧ, оз и думайт пенсия вылӧ петны. Тӧлын и гожӧмын сійӧс шоча сулан гортас, век вӧрын. Вӧр-ва йылысь унатор тӧдӧ. Вӧрын сыкӧд ветлӧдлігӧн, меным частӧ висьтавліс аслас приключениеяс йылысь, зверь-пӧткалӧн пӧвадкаяс йылысь.

Ӧтчыд тулыснас сійӧ гортас вайис кык кӧчпи, вӧліны ичӧтикӧсь, слабиникӧсь.

— Быть лои вайны, коньӧръясӧс, — висьталӧ Микол дядь. — Ме вӧлі локта нин гортӧ... Видзӧда: ӧтилаын руч кӧйялӧ, кыйӧдчӧ. Лыйны кӧть эськӧ, да буретш ружьеӧй эз вӧв сьӧрысь. Думайта, оз прӧста мудерыд сэні кӧйяв! Мыйӧн менӧ аддзис, ӧдйӧ тай усйысис, сӧмын бӧжсӧ и аддзылі... Сувті, кывзыся... Кыла, кодкӧ нивзӧ неылын. Муні шы вылас и пыр жӧ гӧгӧрвои: со мыйла кузь бӧжыд тані кыйӧдчӧма. Вӧлӧмкӧ, понӧль улын, ичӧтик гӧптын, кольӧм вося кос турун вылын, кык кӧчпи куйлӧны да никсӧны. Сирӧтаяс, буракӧ... Топӧдчӧмаӧсь, коньӧрушкаяс, ӧта-мӧд бердас, ичӧтикӧсь, пельясыс кузьӧсь, гӧгрӧс синъясыс гырысьӧсь. Гашкӧ, кынмӧны, гашкӧ, кынӧмъясыс сюмалӧ, — сӧмын нивзӧны, быттьӧ бӧрдӧны. Гашкӧ и, збыль бӧрдӧны. Быд ичӧтик лов ӧд мамтӧгыс бӧрдӧ. А мамыс, буракӧ, тӧрыт нин найӧс эновтӧма, пышйӧма... Кӧчьясыдлӧн татшӧм дивӧыд овлӧ... Вердас пиянсӧ ӧти лун и уйтыштас-пышъяс. Мый лоӧ пияныскӧд, сы йылысь оз думыштлы. Пияныс виччысьӧны мамсӧ, а локтас оз бӧрсӧ? Код тӧдас... Овлӧ и сідз, мый эновтӧм кӧчпиян дорӧ кежавлас мӧд кӧч-мам. Сійӧ лелькуйтыштас найӧс, вердас аслас йӧлӧн... и бӧр мунас. Со ӧд мый овлӧ кӧчьясыдкӧд.

А этійӧясӧс кольны вӧрас вӧлі оз позь... Гӧрд пасяыс регыд эськӧ номсасис наӧн... Нинӧм, верда-юктала, мед ёнмыштасны да бӧр катӧда важ местаас. Мед котралӧны...