ПӦРЫСЬ КЫДЗ ПУ

Миян сиктсянь неылын, важ мир туй дорын, важысянь-важысянь сулаліс ӧтка пӧрысь кыдз пу. Тулысын и гожӧмын шпорӧдчис сійӧ веж коръяснас, сы пашкыр увъяс вылын лун и вой дзольгисны-сьылісны лэбачьяс, гажӧдісны ветлысь-мунысьясӧс. Арнас веж коръясыс вижӧдлісны, сэсся вочасӧн гылавлісны муас, быттьӧ тӧв кежлас ас гӧгӧрыс вольсавліс мусӧ мича джодждӧраӧн. Сиктын эз вӧв морт, коді эськӧ эз аддзыв тайӧ пусӧ. Йӧзыс ветлӧдлісны таті и видзьяс вылӧ, и вотчыны...

А пуыс воысь-во пӧрысьмис, сэсся эз кут вермыны водзсасьны лэчыда пушкысь тӧвъяслы, и ӧтчыд арся войӧ пӧри небыд веж нитш вылӧ. Пучер вылас сюмӧдыс потласис да трубкаӧ гартчис, а дзик уліас, вужъяс дорас, кӧтасис да сьӧдӧдіс. Тулыснас пӧрӧм пу гӧгӧр чургӧдчисны нэриник веж петасъяс. Да, коляс мыйкӧ дыра кад, и пӧрысь кыдз пу сісьмас, а том петасъясыс быдмасны, ёнмасны, мичаммасны да артмӧдасны тані, гашкӧ, быдса рас. Сідзкӧ, пӧрысь кыдз пу эз кув, а олӧ аслас быдтасъясӧн.