ЗАРАВА
Тулыс паськыда восьтіс ассьыс ӧдзӧсъяссӧ. Гӧрчак гӧра вывсянь бузгӧны-лэччӧны Мизин юӧ шоръяс, гӧра лун бокыс кушмис. Сылі лымйыс и менам ӧшинь улын градъяс вылысь. Шондінас шонтӧм керка стен дорын мыччысис таво вылӧ медводдза дзоридз — вижъюр. Тайӧ медводдза тувсов дзоридзыс ышӧдіс менӧ кайлыны вӧрӧ. Быд во тайӧ каднас кайлывла вӧрӧ вийӧдны зарава.
Ме тӧді, мый пыді вӧрӧ тулысыс локтӧ сёрӧнджык, но век жӧ надейтчи, мый матігӧгӧрса вӧръясысь лымйыс важӧн нин сылі. Но ӧшыбитчи. Кӧнсюрӧ лымйыс вӧлӧма вель на уна. Туйбокса канаваясын чукйӧн вӧлі ва.
Ме ньӧжйӧник муна вӧр туйӧд. Шонді кайӧ пыр вылӧджык, шонтӧ мышкуӧс. Пӧрччи кепкаӧс, сюйи куртка зептӧ. Муна, видзӧда гӧгӧр и аслым ог эскы: туйбокса кустъяс сайысь кайӧ еджыд тшын. Видзӧдлі мӧдарӧ — бара тшын тыдалӧ... Мый нӧ тайӧ? Век жӧ гӧгӧрвои: тайӧ шондіыс ӧзтіс лым вылас бипуръяс. Кольӧмаӧсь вазьӧм лым чукӧръяс, и на весьтын кайӧ еджыд ру.
Петі пожӧма мыльк вылӧ. Тані лымйыс абу нин. Пуясыс сулалӧны шоча. Кыла, кӧнкӧ клёнӧдчӧ сизь. Лӧсьӧді фотоаппаратӧс да мӧдӧдчи сылань. Матыстчи и аддза: кос конда щелльӧ сизьыс топӧдӧма пожӧм коль да сизьдӧ сійӧс, перйӧ кӧйдысъяссӧ. Кӧсйи ещӧ матыстчыштны, но сизь лэбис. Меысь али мый повзис? Абу. Со сійӧ бӧр локтіс да веж коль местаас топӧдіс мӧдӧс, выльӧс. Тадзи сійӧ вежис некымын коль, а ме век на сулалі да шлочйӧдлі-снимайті сійӧс. Сэсся сизь, буракӧ, пӧтіс да лэбис кытчӧкӧ, сэсся эз нин волы.
Ме бергӧдчи мӧдарӧ, кӧсйи нин мӧдӧдчыны водзӧ, но друг кылі, кодкӧ орчча пу вылын шарӧдчӧ. Ок тэ, вильышпоз! Вӧлӧмкӧ, ме кыйӧдча сизь бӧрся, а ме бӧрся — ур! Пожӧм пучер сайсянь, то ӧтар боксяньыс, то мӧдар боксяньыс, видзӧдлывлӧ ме вылӧ. Бара лӧсьӧді фотоаппарат да веськӧді сы вылӧ. Но снимайтны эз удайтчы, кайис вылӧджык. Куті кытшлавны пу гӧгӧрыс, корсьны сійӧс. Кор аддзи, сійӧ чеччыштіс мӧд пу вылӧ, сэсся коймӧдӧ да пуксис ув вылӧ. Дзоръялӧ гӧгӧр. Зэв бура тыдалӧ! Шлочниті ӧтиысь, мӧдысь эг удит, пышйис водзӧ. Ме эновтчи сыысь. Нинӧм, тырмас. Талун, позьӧ шуны, мойвиис меным: лэбач дай пемӧс снимайті.
Веськӧдчи тӧдса кыддза раскӧ. Тані гажа, лӧсьыд!.. Тӧвся кузь ун бӧрын кыдзьяс ловзьӧмаӧсь, кыпӧдӧмаӧсь юрнысӧ, нимкодясьӧны. Да кыдз нӧ он нимкодясь! Налӧн ӧні ворсӧ вирыс. Вужсяньыс быд ув вожӧдз кайӧ зарава.
Ме татчӧ быд тулыс вола гоз-мӧдысь. Таво первойысь на. Но мый тайӧ? Кыдз пу вылын бара сизь тотшкӧдчӧ! Тайӧ, буракӧ, тӧдсаӧй менам зарава юны локтӧма. Клёнӧдӧ-розьӧдӧ сюмӧдсӧ да кырсьсӧ. Мед юӧ. Ме эг торк сійӧс, а муні бокӧджык, кӧні чегӧм ув вожті тёпкӧдіс-вияліс зарава. Кӧдзыд, чӧскыд!
