ЕНЭЖЫН СЬЫЛАНКЫВ

Уна пӧлӧс лэбачьяс сьылӧны тулыснас вӧрын, луд вылын. Кутшӧмӧс сӧмын он аддзыв, кутшӧм гӧлӧс сӧмын он кывлы?! Быд лэбачлӧн сӧмын аслас сьыланкыв. Ылі муысь локтӧм бӧрын быдӧн кӧсйӧны аслас синъясӧн аддзӧдлыны тӧдса местаяс, кодъясысь тӧвбыдӧн быри гажыс, видзӧдлыны ю дорын сулалысь тӧдса кыдз пу вылӧ, веж лудъяс вылӧ, югыд сӧстӧм енэжӧ, важ тӧдса ёльысь юыштны сӧстӧм кӧдзыд васӧ да чолӧмавны ставнысӧ найӧс гора сьыланкывйӧн. Мун тэ вӧрӧ, пет веж луд вылӧ да кывзы налысь сьылӧмсӧ. Найӧ тшӧтш и тэныд сьылӧны, чолӧмалӧны тэнӧ. Уна гӧлӧсъяс пиысь тэ кылан гора, мыла гӧлӧс и енэжсянь.

...Паськыд эрд... Кӧнсюрӧ тыдалӧны на лым колясъяс. Гораа бузгӧны шоръяс, берег дорын дзоридзалӧны бадь пуяс. Видз вылын веж петасыс сорлассьӧма кольӧм вося кос турункӧд. Лӧз югыд енэжын дзирдалӧ шонді, мелі лун тӧв ворсӧдчӧ кос турун сіясӧн. И друг вылісянь тэ кылан мыла гор, сійӧ лэччӧ муас да разалӧ эрд вылӧ. Кутшӧм кузь да гажа сьыланкывйыс! Тадзи вермӧ сьывны сӧмын сійӧ, кодлӧн сьӧлӧмыс тыр шудӧн, коді радейтӧ чужан мусӧ. Тайӧ — енкай.

Водз тулысын найӧ локтӧны чужан муӧ. Овмӧдчӧны да олӧны муяс да видзьяс вылын. Локтӧмсяньыс гожӧм помӧдз оз лӧньлы налӧн гора да гажа сьылӧмыс. Мудз бӧрын сылы эськӧ шойччыны, вугралыштны, ёнмӧдчыштны, но оз вермы: сійӧс кыскӧ енэжӧ.

Енкай сійӧ шоча овлысь сэтшӧм лэбачьяс пиысь, коді сьылӧ лэбалігас. Мусяньыс сійӧ веськыда качӧ вывлань, сэсся кытш вӧчалігтыр кайӧ — лэбӧ енэжас вылӧ-вылӧ. Кор кыпалас вылӧ, бордъяссӧ тэрыба вӧрӧдіг, уськӧдчылӧ то шуйгавылӧ, то веськыдвылӧ, то тюрас увлань, то качӧдчӧ вывлань. Лэбалігас век сьылӧ и сьылӧ. Сьылігтыр сійӧ лэччӧ и муас. Пуксяс, шойччыштас, видзӧдан и бара нин лэбӧ вывлань да помтӧг сьылӧ и сьылӧ.

Быдӧн кывзӧны сылысь сьылӧмсӧ, кывза да любуйтча тшӧтш и ме, да думысь шуала: «Сьыв, тэ сьыв... Тулысбыд сьыв, гажӧд чужан мутӧ, вӧр-васӧ, йӧзсӧ»...