АСЪЯ ВӦРЫН

Ру, помтӧм еджыд ру. Вӧрын кӧнсюрӧ лымъя на, но бадь пуяс вель важӧн нин едждісны эзысь рӧма дзоридзьясӧн. Нырад чамгӧ кольӧм вося усьӧм коръяслӧн дукыс и сылӧм мулӧн кӧрыс.

Пуяс пасьтӧмӧсь на и вӧрас тыдалӧ ылӧдз. Вутшъяс вылын чурвидзӧ кольӧм вося едждӧм туруныс. Сьӧдасьӧм важ коръяс пыр петкӧдчӧны выль петасъяс. Вӧрын шы ни тӧв. Муна и видзӧда, кыдзи вежсьӧма ывлаыс. Со дзизгӧ сьӧд-виж пася мазі, буракӧ, неважӧн на садьмӧма, гӧгралӧ вутшъяс дорті, корсьӧ дзоридзьяс, но найӧ абуӧсь на. Прӧйдиті мегыр моз кусыньтчӧм вӧсни кыдз пу увті. Трӧпа вылын тыдалӧ кутшӧмкӧ лэбачьяслӧн вирӧсь руд гӧныс, тыдалӧ, варыш тані пируйтӧма.

А со кыз нитшка важ мыр вылын урлӧн столӧвӧй. Сюсь пемӧс чукӧртӧма сэтчӧ коз кольяс, кодсюрӧӧс килльӧма нин. Ачыс кӧнкӧ, вильышпоз, дзебсис козлӧн сук лапъяс сайӧ да видзӧдӧ: кутшӧм гӧсть локтіс вӧрас?

Вӧрын лолавсьӧ кокниа, сьӧлӧм вылад долыд. Юр весьтын вылын дӧввидзӧ кельыдлӧз енэж. Кӧнкӧ тотшкӧдчӧ сизь, чивзӧны пыстаяс, — найӧ воӧмаӧсь нин сиктъясысь вӧрӧ, медым тані быдтыны челядьӧс.

Орчча трӧпаӧд бергӧдчи бӧр. Петі вӧр дорас. Ранитӧм кыдз пу улӧ кодкӧ пуктӧма да эновтӧма банка. Сэні тырыс зарава, петӧ ортсыӧ. Кодлӧн лыбӧма киыс ранитны пусӧ? Колӧ отсавны пуыслы!.. Но кыдзи? Вешйи бокӧджык, пуртӧн кодйышті мусӧ, босьті китыр сёй да кыза мавті пуыслысь ранасӧ. Сэсся важ трапкаӧн кӧрталі сійӧс. Ог тӧд отсалас оз!! А вылын пӧжӧ шонді, сетӧ муыслы выль олӧм, вын.

Тулыс восьлалӧ водзӧ.