УДЖ
— Таръяслысь койтӧм эн на, кӧнкӧ, аддзыв? — юаліс менсьым Микол дядь.
— Кытысь? Дерт жӧ, эг, — вочавидзи.
— Кӧсъян кӧ, аски кайлам ягӧ. Сӧмын водз-водз. Зэрышталӧм бӧрын, пӧди, койтыс абу нин лымъя...
Быдӧнлы окота видзӧдлыны, кыдзи «свадьбуйтӧны» таръяс. Ме сӧгласитчи.
Гортысь петім водз, медым югдігкежлӧ воны места вылӧдз. Кор локтім, ме чуйми: ёртӧй менам коркӧ удитӧма нин татчӧ вӧчны коз лапъясысь чом, пытшкӧссӧ весиг ньыв лыскӧн вольсалӧма, — быттьӧ перина вылын, небыд, оз зурӧдчы.
Но век жӧ миян думъясным эз збыльмыны. Гашкӧ, сы вӧсна, мый койтаніныс вӧлі лымъя на, гашкӧ, мыйкӧ мӧдтор вӧсна, но таръяс абу на чукӧртчӧмаӧсь. Сӧмын джуджыд кыдз вылын, ылынкодь, пукаліс ӧти тар да кургис ӧтнас. Куйлім вель дыр. Ме куті кынмыны да петитчи-петі чомсьыс.. Ёртӧй колис ӧтнасӧн сэтчӧ.
Петі, гӧгӧр видзӧдлі. Асыввылын пӧртмасис кыа, енэжыс ыпъяліс ставнас. Мича и луныс лоас! — думышті. Ветлӧдлышті и мыйкӧ дыра мысти мыччысис шонді, ыджыд, дон. Кӧсйи нин мунны бӧр Микол дядь дорӧ, но син улӧ веськалісны кык лэбач.
Найӧ сатшкысьӧмаӧсь туйсянь неылын сісь мыр бокӧ да сизьдӧны-кокалӧны сійӧс.
«Поз стрӧитӧны», — думышті. Кыкӧн. Сідзкӧ, пара, гозъя. Кыкнанныс ӧткодьӧсь — морӧсныс вижоват, юрныс — чим сьӧд, бан бокныс — еджыд, а бордъясныс да бӧжныс — руд. Горзӧны ӧтмоза: «Пинь, пинь! Гтш!» Вот и тӧдмав, коді эньыс либӧ айыс.
Кор менӧ казялісны, ӧтиыс лэбис да пуксис орчча пипу вылӧ, гоньялӧ гӧгӧр, караулитчӧ да видзӧ. «Гтш! Гтш! — эн пӧ матыстчӧй миян дорӧ». А мӧдыс мырсьӧ-пессьӧ, розь пытшкӧссьыс ёгсӧ койӧ ортсыӧ, а тӧвруыс разӧдӧ.
Со нин уджалысьыс пырис пытшкас. Юрыс воши, а бӧжыс сӧмын тракйысьӧ. Да-а, уджыс абу кокни, кӧть и сісь мыр сизьдан. Мыйкӧ дыра мысти сійӧ воши дзикӧдз. Сӧмын юрсӧ гогйӧдліс розьӧдыс. «Гтш!» — вомсьыс шыбитліс ёгсӧ. А веськавлі кӧ ыджыдджыктор, петкӧдас да лэбӧдӧ бокӧ ылӧджык, медым поз дорас некутшӧм пас не кольны. Мӧдыс неуна колльӧдліс сійӧс, сэсся бӧр бергӧдчыліс да пуксьыліс аслас местаӧ. Сэсся найӧ вежсисны.
Ме сулалі вель дыр да видзӧді налӧн зіль удж вылӧ, сэсся муні аслам туйӧд, медым не мешайтны.
