ВЕЖ ОРДЫМ

Дзик на быттьӧ неважӧн пашляк шковӧдчис-лыйсис керка стенъясын. А талун со нин керка вевтъяс вывсянь лунсернас тёпӧдӧ войтва. Ӧшиньясысь сылі кыз гыӧрыс, и керка пытшкын югдіс. Югдіс и ывла вылын. Лунъяс нюжалыштісны, абу нин кӧч бӧж кодь дженьыдӧсь. Кельыдлӧз енэжыс югыд, сӧстӧм, быттьӧ мыськалӧма сійӧс ключ ваӧн. Шонді-матушка аслас мелі югӧръяснас пыр ёнджыка нюлӧ ывла вывсӧ. Ыбъяс вылын лымйыс шнёпкысис-вӧйис, небзис, и абу нин тӧлын кодь син ёран югыд. Туйяс сьӧдӧдісны. Лун бокын мыччысисны сьӧд плешъяс, найӧ лунысь-лун паськалӧны, содӧны. Нӧрысъяс вывсянь увтасінъясӧ писькӧдчӧны му шыръяс моз шоръяс, найӧ лунысь-лун ӧддзӧны, содӧны, ӧтлаасьӧны мукӧдъяскӧд да гораа бузгигтыр котӧртӧны юӧ. Мизин ю дундіс, лӧзӧдіс, регыд потас. Сьӧд ракаяс воисны нин, кравзігтыр чеччалӧны муяс вылын, лукйысьӧны-корсьӧны сёян, — колӧ ёнмӧдчыны кузь туй бӧрын. Водзын налӧн уджыс уна: колӧ дзоньтавны позъяс, вӧчны выльӧс, — ковмас ӧд быдтысьны!

А вӧрын лымъя на. Торйӧн нин уна лымйыс козъя вӧрын, кытчӧ сук лапъяс пырыс оз вермы веськавны шондіыс. Небыдик шоныд лун тӧв уськӧдаліс пуяс вылысь туктаяс, сывдіс гыӧръяссӧ. Увъяс вывсяньыс виялӧ войтва да шылаӧн розьӧдлӧ му вылысь лымсӧ. Пуяс ловзисны, пыркнитісны тӧвся унсӧ. Тувсов зэр мыськалас найӧс сӧстӧм ваӧн, вердас-юкталас, медым регыдджык туктісны да потісны гаръяс. Коръя пуяс пасьталасны выль платтьӧ.

Ягыс гораммис, лоис гулыд, йӧлӧга кылӧ ылӧдз-ылӧдз.

Гажаджык, нимкодьджык лои лэбачьяслы, зверь-пӧткалы, кузь тӧв бӧрын налы локтісны шоныд лунъяс. Шонді петӧмсянь да шонді лэччытӧдз посни лэбачьяс радлӧны тулысыслы, помтӧг сьылӧны, чолӧмалӧны сійӧс.

Муяс да видзьяс вылысь лымйыс сылі неважӧн на, найӧ абу на удитӧмаӧсь вежӧдны. Видзьяс вылын чушвидзӧ кольӧм вося руд турун. Сӧмын лун бокӧд локтысь трӧпа дзик нин веж. Тайӧ веж трӧпаӧдыс локтіс тулыс.