ТӦЛЫСЯ ВОЙ

Луныс шондіа, югыд, мича. Асывъяснас кӧть и кӧдзыд на, но сынӧдыс ӧвтӧ нин тулыс кӧрӧн. Шондіыс каяс вылӧджык, и керка вевтъяс вывсянь заводитӧ тёпӧдны войтва, первойсӧ ньӧжйӧ — тёп, тёп, сэсся пыр ӧддзӧ, заводитӧ тюрӧдны. Рытнас, мыйӧн кӧдздӧдас, вевтъяс вывсянь ӧшйӧны йи нёньяс. Пуяс йизьӧны-гыӧртӧны.

Яръюгыд шондіыс вӧрзьӧдіс лымсӧ и муяс и эрдъяс вылысь, весиг вӧрысь. Лымйыс джуджыд на, гашкӧ, морӧсӧдзыд лоӧ, но пуксьыштӧма нин. Шонді югӧръяс улын веркӧсыс эзысьӧн дзирдалӧ.

Со пуксис вой, и тӧвся кӧдзыдыс бара на петкӧдлӧ асьсӧ, ассьыс вын-эбӧссӧ. Сылы неокота сетны ассьыс кадсӧ матыстчысь тулыслы. Швачӧбтас сідзи да камгас-дорас ставсӧ, мый сылы ки улас веськалӧ. Вазьӧм лымйыс йизьӧ, артмӧ чарӧм. Ӧні эрдъяс вылын кӧть футболӧн ворс, он вӧй!

А пыдӧстӧм кельыдлӧз енэжыс сэзь, сэтчӧ кӧдзӧмаӧсь югыда дзирдалысь уна-уна кодзув. Найӧ ворсӧдчӧны енэжас, разӧдӧны войся пемыдсӧ, югдӧдӧны паськыд мусӧ, сылысь вӧр-васӧ. Со мыччысис тӧлысь — асык-кольча кодь гӧгрӧс, ыджыд, кӧдзыд, гажаа нюмъялігтыр видзӧдӧ му вылас да кодзувъяс моз жӧ нимкодясьӧ. Ывлаыс лунын моз югыд. Кутшӧм мича му вылас олӧмыс!