ТОННЕЛЬ

Лунъяс кузьӧсь нин. Лӧз енэжын дзирдалӧ шонді. Сынӧдыс сӧстӧм. Он и тӧдлы пыркнитас-воас тулыс. Вӧрын ӧні лӧсьыд... Ме думышті кайлыны ягӧ, ветлӧдлыштны важ тӧдса местаясті.

Мизин ю дорсянь ме кежи важ, тӧдса трӧпа вылӧ, кыті гожӧм-арнас частӧ ветлывлі. А тӧвнас первойысь на. Лымйыс джуджыд, векни лыжиыд вӧйласьӧ. Локті трӧпа вылӧ кежанінӧ, но туйсӧ меным потшисны кык томиник пожӧм. Сулалӧны збодера, тшапа, веж лысъяссӧ чургӧдӧмаӧсь штыкъяс моз. Сулалӧны воча и увъяснас нюжӧдчӧмаӧсь ӧта-мӧд дінас, потшӧны туйсӧ. Мыйлакӧ ме гожӧмнас найӧс эг казявлы. Ӧні видзӧда на вылӧ да думайта: сулалӧны быттьӧ том часӧвӧйяс, вӧрӧ пырысьяслысь юасьӧны пропуск, лэдзны-ӧ вӧрас. «Позьӧ мунны водзӧ?», — думысь юала налысь. Друг ӧти ув вылысь уси ӧшйӧм туктаыс да увйыс копрасьны кутіс: прӧйдитӧй пӧ. Аттьӧ, другъяс. Муна водзӧ.

Кымын пыдӧджык пыран вӧрас, сымын пемыдджык, шуштӧмджык. Местаыс тані васӧд, егыр, гожӧмнас тані быдмӧ чунь пом кодь гырысь пув. Трӧпаыс веськыд, ӧтар-мӧдарас тювӧмаӧсь вывлань дзор тошка козъяс, увъяснас найӧ сывйыштчӧмаӧсь ӧта-мӧдныскӧд да шебрасьӧмаӧсь лым эшкынӧн, мый оз тыдав весиг лӧз енэжыс. Пемыд, шуштӧм. Татчӧ весиг тӧвру оз веськав, лӧнь, сӧмын кӧнкӧ бокынджык, кылӧ, пинясьӧны уркай гозъя. Первой чуйми, сэсся гӧгӧрвои: — ме жӧ тоннельті муна. Нинӧм он шу — тоннель и эм.

Мунышті водзӧ, и тоннельыс друг петкӧдіс менӧ паськыд эрд вылӧ. Тані югыд, гажа, шондіыс ворсӧ лым чиръяснас. Со пуысь пу вылӧ жбыръялӧны пыстаяс. Кыла, кӧнкӧ клёнӧдчӧ сизь. Эрд вылас, быдӧн аслас чукӧрӧн, нимкодясьӧны ывла вывнас ловпуяс, пипуяс, кыдзьяс. Пӧттӧдз любуйтчи мича серпасъяснас, апалі тулыс кӧра сӧстӧм сынӧдсӧ, сэсся мӧдӧдчи гортлань.

Гортӧ лэччи мӧд туйӧд.