АДДЗЫСЬЛЫТӦДЗ

Тӧвнад шондіыд дзик гӧсть кодь: петавлас и бӧр вошӧ. Зато лэдзӧ видзӧдны ас вылас. Асывнас петан кильчӧ вылӧ да аддзан, кыдзи Гӧрчак гӧра сайсянь кодкӧ ньӧжйӧник гӧгыльтӧ ыджыд ыргӧн таз. Быттьӧ сӧмын на дорӧмаӧсь кузнечаын да петкӧдлӧны йӧзыслы. Сэні жӧ, енэжас, еджыд тшын гартчӧ, быттьӧ важ кос турун сотӧны. Но сійӧ абу тшын, а еджыд кымӧр пласт. Окота горӧдны: шонді-матуш, гӧгыльтчышт ӧдйӧджык. Но сійӧ оз тэрмась — воис медся джуджыд пожӧм весьтӧдз, майшасьыштіс сэні и воши. Быттьӧ пожӧм емъясас сутшкысис, ӧбидитчис да дзебсис кымӧръяс сайӧ.

Лӧсьыд водз асылын шӧйтны вӧрын. Ме муна паськыд прӧсекӧд. Ӧтар-мӧдарас сулалӧны пашкыр пожӧмъяс, дзор козъяс, пипуяс, ловпуяс, чолӧмася накӧд. Петі неыджыд эрд вылӧ. Дзик шӧрас орччӧн сулалӧны кык кыдз пу. Лымйыс еджыд и найӧ еджыдӧсь, — синтӧ ёрӧ. Пучеръясыс абу прӧстӧ еджыдӧсь, а сьӧд сераӧсь, быттьӧ еджыд пу вылас кодкӧ беринъяс коялӧма. А гожӧмнас, кӧнкӧ, кутшӧм гажа тані? Сулала да любуйтча наӧн. Окота горӧдны налы — энӧ чӧв олӧй, гажӧдчыштӧй! Но кутшӧм ӧні гажӧдчӧм?! Оз ӧд найӧ небыд му да веж турун вылын сулавны, а коскӧдзыс лым пиын. Юр весьтаныс абу мелі шонді, а улӧ ӧшйӧм скӧр букыд енэж.

Сулалӧны ӧта-мӧдыслы воча да варовитӧны, — кадыс, майбыр, налы тырмӧ. Мый йылысь? Код тӧдас... Гашкӧ, кык пӧдруга норасьӧны кӧдзыдыс вылӧ, бушкола чизыр тӧв вылӧ, коді корсюрӧ лёкысь уськӧдчывлӧ на вылӧ, гашкӧ, зверь-пӧтка йылысь, кодъяс волӧны эрд вылас, гашкӧ, мӧвпалӧны выль тулыс да шоныд гожӧм йылысь.

Эн шогсьӧй, мича аканьяс. Ставыс бӧр лоӧ, кужӧй виччысьны. Тулыснас ме бара на вола тіянӧс видлыны. Аддзысьлытӧдз!