ВӦРСА ДОКТОР

Ывлаын рӧмыд на. Усьӧ гӧн кодь небыдик лым, быттьӧ сынӧдас лэбалӧ уна-уна еджыд бобув. Гӧгӧр лӧнь, ставыс узьӧ чӧскыд унмӧн.

Югдіс, и ставыс лоис сэтшӧм еджыд да югыд.

Лӧсьыд татшӧм лунӧ ветлӧдлыны вӧрті. Мунан лыжиӧн векньыдик ордымӧд, кыкнан бокас сулалӧны пуяс, еджыд лымъя ув вожъясыс пашкыртчӧмаӧсь. Корсюрӧ вожъяс вывсьыс лымйыс шливгӧ-исковтӧ да сьӧкыда шнёпкысьӧ муас, лым вылӧ жӧ. Пу вожъясыс дыр на лайкъялӧны, а сынӧдас гартчӧ лым бус. Мунан и любуйтчан ывла вывнас. Ягыс кыпыд, гулыд, сынӧдыс сӧстӧм...

Муна, кывзыся, ӧні быд шы кылӧ ылӧдз. Кӧнкӧ водзын, кыла, тотшкӧдчӧ сизь. Муна видзӧдла сылысь уджсӧ.

Ме дасьті фотоаппарат да ньӧжйӧник мӧдӧдчи сылань, кӧні кыліс тотшкӧдчӧмыс. Муна ньӧжйӧник, медым сійӧс не повзьӧдны. Ордым петкӧдіс менӧ неыджыд эрд вылӧ, кӧні сулалісны кутшӧмсюрӧ шочиник пуяс. Сувті, видзӧда гӧгӧр. А-а, со кӧні тэ?! Сизьыд, другӧ, сатшкысьӧма пипуӧ да сьӧлӧмсяньыс зільӧ-клёнӧдчӧ.

Мича, тшап лэбач! Юрыс да мышкуыс сьӧдӧсь, юр бӧжас — гӧрд чут, а сьӧд бордъяс вылас — еджыд визьяс.

Гыжъяснас сатшкысьӧма пуӧ, мыджсьӧма чорыд бӧжнас да дугдывтӧг тотшкӧдчӧ ёсь нырнас. Зільӧ, тэрмасьӧ. Буракӧ, гаг ли, пучӧй ли корсьӧ, кодъяс тшыкӧдлӧны пуяссӧ. Оз ӧд прӧста сійӧс шуны вӧрса докторӧн.

Ме вель дыр видзӧді сылӧн удж вылӧ. Вӧлі вӧчӧма нин кык розь. Буракӧ, сэтысь гагйыс абу сюрӧма да ме дырйи заводитіс перйыны коймӧдӧс. Сюри эз корсянторйыс ог тӧд, но мыйкӧ дыра мысти сійӧ лэбис.

...Ладнӧ, туй веськалас, кежала ещӧ татчӧ тулыснас. Но кор тулыснас локті татчӧ, сизьӧс эг нин аддзыв да и пипусӧ кодкӧ пӧрӧдӧма. Ме пукси пипу мыр вылас, шойччышті да мӧдӧдчи водзӧ.