ЛЭБАЧ ПОЗ
Тӧвся каникулъяс дырйи сиктса челядькӧд ми кайим Ыджыд ягӧ. Челядь важӧн нин вӧзйысисны, мед ме катӧдлі найӧс вӧрӧ. Ягын ветлӧдлім вель дыр, волім уналаӧ. Челядь мыйсюрӧ снимайтісны. Чайта, интереснӧй фотовыставка лоас школаын. Аддза, челядь мудзисныкодь. Лыжияс веськӧдім гортлань. Друг челядь пиысь кодкӧ горӧдіс:
— Вай тайӧ коз пу дорас шойччыштам?
— Позьӧ, — вочавидзи ме. — Колӧкӧ и чай юыштам...
«Ура» горзігтыр челядь разӧдчисны пес корсьны, а ме перйи вещмешӧкысь чайник, кружка, чай банка. Недыр мысти коз пу дорын ыпъяліс нин бипур. Чайникын сывдім лым, пузьӧдім чай... Бипур дорын чай юигӧн, да ещӧ тӧвся вӧрын, челядь варовмисны, ӧта-мӧд вежмӧныс быдӧн зільӧ висьтавны мыйкӧ аддзывлӧмтор либӧ кывлӧмтор. Ме найӧс ог торкав, кывза сёрнисӧ, а ачым важӧн нин казялі, мый миян коз пу гӧгӧр дугдывтӧг лэбалӧны кык лэбач. Матыстчыласны миян дорӧдз, сэсся коз пу пӧлӧныс качӧны вывлань, кытчӧкӧ вошлӧны да горзігтыр бӧр тювӧны увлань, миянлань... Ме гӧгӧрвои: лэбачьяс вӧтлӧны миянӧс. Видзӧдлі бурджыка: да тайӧ жӧ уркай пара. Крукыля гӧрба нырыс крестасьӧма, а паськӧмыс мича: морӧсыс вижоватгӧрд, мышку вылыс — кӧнтусь сера, бӧжыс чим сьӧд.
«Кӧнкӧ пу вылас, буракӧ, поз эм», — думышті. Ме ӧлӧді челядьӧс, тшӧкті кусӧдны бипур да вешйи бокӧ. Босьті бинокль, видзӧда: сідзи и эм, пу шӧрас кымын, ствол бердас, ляскысьӧма сьӧд ёкмыль. Челядьысь ӧмӧй мыйкӧ верман дзебны? Найӧ аддзӧмаӧсь жӧ нин сійӧс.
— Видзӧд, видзӧд, лэбач поз... Час ме кайла да видзӧдла...
Ме эг на удит мыйкӧ шуны, Коля Шахов, визув детинка, коз улӧ пӧрччӧма нин курткасӧ, валегисӧ да кавшасьӧ пу вылас...
А недыр мысти Коля горзіс нин пу вывсянь.
— Ой, кутшӧм интереснӧ... Лэбач поз! Дзик пу бердас... Пытшкас небыд гӧн... шоныд... Со куим юр мыччысисны, вомнысӧ паськӧдӧмаӧсь... Сёйны, буракӧ, корӧны... Пож тыр дивӧ! Тӧв шӧрын лэбачпиян?! Первойысь аддза...
— Эн вӧрӧд найӧс! — горӧді ме. — Лэччы сэтысь!..
...Челядь зэв дӧвӧленӧсь. Эз весьшӧрӧ кайлыны талун вӧрӧ. Тӧдмалісны, мый миян войвылын эм лэбач, коді оз ветлы лунвылӧ, а пыр олӧ тані, весиг пӧжсьӧ тӧв шӧрын. Тайӧ лэбачыс — уркай.
Челядь гораа варовитӧны, сёрниыслы пом абу. Ми зіля вешйим пу дорысь.
