ВЫЛЬ ВОЛЫ ПАНЫД
Декабрь век овлӧ зумыш. Но петалас кӧ нин шонді, ывлаыс пыр жӧ вежсьӧ, югдӧ, — ставыс эзысьӧн дзирдалӧ шонді саявтӧдз. Выль волы паныда лун. Ме ньӧжйӧник муна вӧрса трӧпаӧд. Юр весьтын жбыръялӧны пыста пара. Со найӧ пуксисны менам туй вылӧ водзӧджык: «дзинь-дзинь» шуалӧны, гӧститӧд пӧ миянӧс. Ме койышті трӧпа вылас семечки да муна водзӧ. Туйыс чукльӧдлӧ пуяс костӧд, нуӧдӧ водзӧ. Пуяслӧн вуджӧръясыс лӧзалӧны лым вылас. Лым чиръясыс дзирдалӧны, быттьӧ кодкӧ кӧдзӧма дона изъяс: сувт да ӧкты. Муна водзӧ. Со меным паныдасисны дзор коз да пашкыр пожӧм. Найӧ туй вомӧныс кутчысьӧмӧн сулалӧны ӧта-мӧд вылас мыджсьӧмӧн. Козйыслӧн улӧдз ӧшйӧма кузь дзор рой тошъяс, а увъяс вылас тӧлыс тэчӧма вата кодь небыд лым пӧдушкаяс. Пожӧмыс паськыда шевкнитӧма увъяссӧ, а лысъясыс еджыдӧсь, пудритчӧмаӧсь пужйӧн.
— Видза оланныд, коз-пӧль да пожӧм-пӧч! Локтан выль воӧн тіянӧс!
— Аттьӧ, туй морт. Выль воӧн и тіянӧс, — вочавидзисны найӧ.
— Коз-пӧль! Тэ, кӧнкӧ, ёна нин пӧрысь? — юала. — Со тошкыд ёна нин дзор?
— Туй морт, тошкыс кӧть и дзор, а сідзсӧ ме абу на ёна пӧрысь — меным кыксё кымын арӧс. А менам ёртъяс кодсюрӧ олӧны кык ме мында... А пӧрысьмыны некод оз кӧсйы... Окота пыр томӧн лоны... Верман кӧ, вай козьнав меным томлунсӧ!..
Ме ветлі коз пу дорӧ, ӧкті кольяс, пылли да кӧйдыссӧ кӧдзи коз пу гӧгӧрыс.
— Со тэныд козьнала и томлун. Челядьтӧ быдтігад томмылан, да и гажаджык лоӧ. Видз найӧс!..
— Быдӧнлы томӧн окота лоны, — шыасис сэки пашкыр пожӧм. — Ми вот, пожӧмъяс, ставыс кӧ лючки-ладнӧ, дыр олам, нёльсё воӧдз весиг. А кувны, сісьмыны, абу окота. Овны эськӧ югыд шонді улас нэмсӧ, не кувлыны...
— Кувны, дерт, некодлы абу окота... Пожӧм-пӧч, ме сиа тэныд кузь-кузь нэм... На, — койышті ме сы гӧгӧр пожӧм кӧйдыс. — Мед паськалас тэнад рӧдыд, мед некор оз помасьлы...
Мукӧд пуяс кывзӧны миянлысь сёрни, чӧв олӧны.
Накӧд прӧщайтчи да мӧдӧдчи бӧр гортлань. Кок улын дзуртӧ лым. Тикӧн мыльк вывсянь мыччысис миян грезд. Керка вевтъясыс еджыдӧсь. Керкаясысь енэжас качӧ-тюрӧ вӧсньыдик лӧз тшын, — ломтысьӧны ичӧт пачьяс. Лэччысь шонді югӧръясысь керка ӧшиньяс ӧзйӧны-сотчӧны, быд ӧшиньясын пӧжар. Ломтысьӧны пывсянъяс. Некымын час мысти Выль во.
