КӦДЗЫД ШОНДІ

Ми другкӧд вуграсям Ыджыд тыын. Тыыс кушинын, берег доръясас ни ӧти пу, ни ӧти бадь куст абу, и тӧлыс гуляйтӧ, кыдзи сылы окота. Кӧдзыд. То и делӧ чеччылам ящикъяс вылысь да котралам, тувкӧдам ӧта-мӧднымӧс, — шонтысям. Табъяс ӧдйӧ йизьӧны, и киысь черпактӧ пӧшти он и лэдзлы, век лоӧ весавны йӧрдансӧ. Кияс кынмӧны, и видза зептын. Менам сэтчӧ сюйӧма важ ыджыд пась сос. Кепысьнас он вермы ни самасьны, ни черитӧ мездавны. Кӧть тӧлакодь, а чериыс талун сёйӧ да мунны абу на окота, кӧть эськӧ ёртӧй важӧн нин нуӧдчӧ гортӧ. Думысь век виччыся шонді петӧм. Думӧн казьтыла, кутшӧм мелі да шоныд овлӧ гожӧмнас. Пукалан берег дорын вугыр шатьӧн, а шондіыс малалӧ тэнсьыд чужӧмтӧ... Ӧні эськӧ татшӧм шонді водзас пукыштны!

Видзӧдлі енэжас. Кымӧръясыс талун абу кызӧсь, да и на пӧвстын костъяс эмӧсь, но некыдз оз вермы петны шондіыс...

Кадыс тюрӧмӧн-тюрӧ. Со нин татчӧ ракаяс лэбӧны. Найӧ быд рыт татчӧ волывлӧны, медым ӧктыны кольӧм нидзувъяс, приманка коляс, а то и черияс. Куим-нёль ёкышпитӧ либӧ йӧрштӧ, буракӧ, гортас некутшӧм чери кыйысь оз ну, челядьыд сераласны... Сідзкӧ, матысмӧ нин рыт. Горӧді друглы, мед чукӧртас да петас машина дорас.

А сэки буретш мыччысис шонді. Буракӧ, чашйис-косявліс кымӧръяссӧ да век жӧ мыччысис, но радлыны сы вылӧ, вӧлӧмкӧ, нинӧмла. Абу сійӧ сэтшӧм, кутшӧмӧс ме виччыси. Абу мелі и оз шонты. Сійӧ ачыс ыргӧн кодь гӧрд, но, буракӧ, ачыс кынмӧ.

Ылькнитіс тӧв ныр. Сійӧ гартіс лымсӧ да нӧбӧдіс береглань. Менам друг петіс берегӧ шонтыны машинасӧ. Сы бӧрся тӧлыс гартіс-нӧбӧдіс кодлыськӧ полиэтиленӧвӧй мешӧк. Ме дорті со нӧбӧдӧ кодлыськӧ кепысь пӧвсӧ, кӧзяиныс вӧтчӧ да кутны оз вермы.

Ме дорӧ матӧ пуксис рака да кокъяссӧ дзебис ас улас. Пукалыштіс недыр да бӧр лэбис. Кӧдзыдыс вӧтліс, буракӧ.

Ме тэрмасьӧмӧн гартлі лескаяс, сэсся мешӧкӧ сюйи ледобур да мӧдӧдчи береглань. Ещӧ видзӧдлі шонді вылӧ, — сійӧ век ӧткодь — ыджыд, гӧрд, ньӧжйӧник тупыльтчӧ вӧртаслань. А тӧлыс пыр ёнмӧ и ёнмӧ.