КИТЫР МОРОЖЕНӦЙ

Лымйыс абу на джуджыд. Туй бокын кузяла сярвидзӧ косьмӧм кузь ёг турун. Лыжи исковтӧ бура, ачыс лэбӧдӧ. Вӧрын лӧнь. Миянлы паныдасис сӧмын пыста чукӧр. Сиктӧ, буракӧ, лэбисны.

Ми петім важ мельнича улӧ, Сидӧр вис дорӧ. Сэні гожӧмъяснас частӧ вуграсьлывлім. Тыыс абу ыджыд, но коркӧ чериа вӧвлі. Ӧні йиыс абу на кыз, но надежнӧй нин. Писькӧдім ӧти розь, мӧдӧс. Вӧйтім вугыръяс, виччысям. Но талун мыйлакӧ оз сёй, табъясным эз на вӧрзьывны. Юлялӧн быри терпениеыс, шыбитіс шатинсӧ ноп дорӧ да муніс ты мӧдарас вӧрӧ. Ме вежлалі местаяс, но весьшӧрӧ. Став чериыс тыас быттьӧ кулӧма. Сэки ме муні дзик вис дорас, кыті Мизин юӧ тюрӧдӧ-петӧ тысьыс ваыс. Дӧбнитіс ӧтчыд, мӧдысь. Сэсся ӧти бӧрся мӧдӧс лэпті куим йӧрш, да вит-ӧ-квайт ёкышпи.

Локтіс Юля, тапкис пельпомӧ. Ачыс дӧвӧль, нюмъялӧ:

— Но, мый, сёйӧ оз?

Ме лэптыштлі пельпомъясӧс. А кор аддзис чунь кузьта ёкышпиянӧс, серам сорӧн шуис:

— Мелюзга... Менам кыйдӧсӧй бурджык... На видлы, — сэсся кисӧ сюйліс зептас да сетіс меным китыр кын турипув. Тусьыс пемыдгӧрд, гырысь. Ӧти тусь сюйи вомӧ, нёняла мороженӧй моз. Чӧскыд! Юля ректіс вотӧссӧ полиэтиленӧвӧй мешӧкӧ. Вӧлӧмкӧ, сылӧн кыкнан зеп тырыс.

Ачыс гажаа нюмъялӧ, быттьӧ сыысь шудаджык мортыс абу. Да тайӧ и гӧгӧрвоана. Быд турипув тусь — зарни гожӧм казьтылан пас, сыкӧд прӧщайтчан пас.